ՄԵԾՆ ԼԻԲԱՆԱՆԻ ՀՌՉԱԿՈՒՄԻ 100-ԱՄԵԱԿԻՆ ԱՌԻԹՈՎ ՆԱԽԱԳԱՀ ԱՈՒՆԻ ՅԱՅՏԱՐԱՐՈՒԹԻՒՆՆԵՐԸ ԿԸ ԲՌՆԿԵՑՆԵՆ ՊԱՇՏՕՆԱԿԱՆ ԹՈՒՐՔԻԱՆ

0

Մեծն Լիբանանի հռչակումի 100-ամեակի տօնակատարութեանց մեկնարկին առիթով` հանրապետութեան նախագահ զօր. Միշել Աուն շաբաթ, 31 Օգոստոս 2019-ին, երեկոյեան ժամը 8:00-ին, լիբանանեան լսատեսողական լրատուամիջոցներուն ընդմէջէն պատկերասփռուած պատգամ մը ուղղեց լիբանանցիներուն:

Իր խօսքին մէջ նախագահ Աուն շեշտեց, որ իրենք Մեծն Լիբանանը կը փափաքին ունենալ յառաջիկայ հարիւրամեակին, եւ ինչու չէ նաեւ յառաջիկայ հազարամեակին եւս, որովհետեւ անիկա ազատութիւններու եւ քաղաքակրթութիւններու, ժողովրդավարութեան, բազմազանութեան, նորարարութեան, ինչպէս նաեւ հաւատքի եւ աւանդներու հայրենիքն է:

Նախագահ Աուն ընդգծեց, որ 1516-1918` չորս դար եւ երկու տարիներու ընթացքին, Լեռնալիբանանը ապրեցաւ Օսմանեան Կայսրութեան տիրապետութեան տակ, եւ հակառակ իրենց ապրած որոշ ինքնավարութեան, լիբանանցիք տառապեցան, որովհետեւ օսմանեան վարչական բաժանումներուն պատճառով փոփոխութեան ենթարկուեցաւ Լեռնալիբանանի աշխարհագրական տարածութիւնը, մինչ Լիբանանի միւս շրջանները անջատուեցան եւ ենթակայ մնացին օսմանեան ուղղակի տիրապետութեան:

Ան հաստատեց, որ օսմանեան իշխանութեան ճիրաններէն ազատագրուելու իւրաքանչիւր փորձի դիմաց կ՛արձանագրուէին բռնարարքներ, վայրագութիւն, ոճիր, ինչպէս նաեւ համայնքային սադրանքներ: «Օսմանեան Կայսրութեան կողմէ լիբանանցիներուն դէմ գործուած պետական ահաբեկչութիւնը, յատկապէս Համաշխարհային Ա. պատերազմի ընթացքին, պատճառ դարձաւ, որ հարիւր հազարաւոր լիբանանցիներ զոհերը դառնան սովի, զինուորագրումի եւ բիրտ ու վայրագ այլ արարքներու: Պէտք չէ մոռնալ նաեւ Օսմանեան Կայսրութեան բարձրացուցած կախաղանները, որոնց ընդմէջէն անոնք փորձեցին ճզմել ազատատենչութեան ու պայքարի կամքը: Այս բոլորին կողքին պէտք է աւելցնել նաեւ ապահովական եւ վարչական բոլոր հաստատութիւններուն եւ կազմակերպութիւններուն դէմ հասած հարուածը, երբ Ճեմալ փաշան պաշտօնազրկեց Լեռնալիբանանի կառավարիչ Յովհաննէս փաշան: Այդ պատերազմէն ետք, օսմանցիներուն ձախողութեամբ է, որ Լիբանան մուտք գործեց ֆրանսական հոգատարութեան ներքեւ եւ սկսաւ իր պատմութեան նոր փուլը, որուն շնորհիւ կրցաւ հասնիլ 1920-ի Մեծն Լիբանանի հռչակումին, եւ ապա` անկախութեան», շեշտեց նախագահ Աուն:

Ան կոչ ուղղեց նորահաս սերունդներուն սորվեցնելու Լիբանանի պատմութիւնը` աւելցնելով, որ երկիրները կը գոյատեւեն, երբ անոնց գերիշխանութիւնը կը գոյատեւէ:

«Մենք ամբողջ աշխարհին կ՛ըսենք, որ Լիբանան խաղաղութիւնը սիրող երկիր է եւ բնաւ պատերազմ չի սանձազերծեր, բայց եւ այնպէս լիբանանցիները օր մը օրանց չեն նահանջած եւ պիտի չզլանան պաշտպանելու իրենց հայրենիքը, եթէ անոր գերիշխանութեան կամ անոր ազգային արժանապատուութեան դէմ որեւէ ոտնձգութիւն կատարուի: Լիբանան որեւէ բռնագրաւումի եւ հոգատարութեան դիմաց տեղի պիտի չտայ», ըսաւ նախագահ Աուն:

Ան աւելցուց, որ Լիբանանի դէմ գործուած իսրայէլեան վերջին բռնարարքին դիմաց ցուցաբերուած լիբանանեան համախոհութիւնը, ինչպէս նաեւ հայրենիքը պաշտպանելու իրաւունքին ընդգծումը մեծագոյն փաստերն են, որ Լիբանան կառչած կը մնայ իր պետականութիւնը եւ իրաւունքները պաշտպանելու սկզբունքներուն:

Նախագահ Աուն իր պատգամը եզրափակեց հաստատելով, որ երկրին պետական հաստատութիւններն են, որոնք կ՛երաշխաւորեն երկիրը, ինչպէս նաեւ անոնք հիմնասիւներն են, որոնց վրայ կանգուն կը մնայ հզօր եւ կարող հայրենիքը:

 

Աղբիւրը՝ «Ազդակ»

 

Share.

Leave A Reply