ՀԱՅԿԱԿԱՆ
«ԱՐԱՐԱՏ-ԱՐՄԵՆԻԱ»Ն ԴՈՒՐՍ ՄՆԱՑ ԵՒՐՈՊԱՅԻ ԼԻԿԱՅԻ ՄՐՑՈՒՄՆԵՐԷՆ
Հայաստանի ֆութպոլի ախոյեան «Արարատ-Արմենիա»ն չկրցաւ անցնիլ Եւրոպայի լիկայի խմբային փուլ: Փլէյ-օֆֆի դարձի խաղին հայաստանեան խումբը 1-2 արդիւնքով զիջեցաւ Լիւքսեմպուրկի ախոյեան «Թիւթելանժ»ին: Երկու խաղերուն աւարտին արդիւնքը հաւասար մնաց՝ 3- 3: Մրցավարին կողմէ տրամադրուած լրացուցիչ ժամանակշրջանին խումբերը չյաջողեցան կոլ նշանակել, եւ անցան 11 մեթրի հարուածներու, ուր բախտը ժպտեցաւ Լիւքսեմպուրկի կազմին: Այսպիսով, «Արարատ-Արմենիա»ն աւարտեց Եւրոպայի լիկայի իր ելոյթները, իսկ «Թիւթելանժ»ը երկրորդ տարին անընդմէջ իր երկիրը պիտի ներկայացնէ խմբային փուլի մրցումներուն:
ԼԵՒՈՆ ՋՈՒԼՖԱԼԱԿԵԱՆ ՀՐԱԺԱՐԱԿԱՆԸ ՆԵՐԿԱՅԱՑՈՒՑ
Յունահռոմէական ոճի ըմբշամարտի Հայաստանի հաւաքականի գլխաւոր մարզիչ Լեւոն Ջուլֆալակեան հրաժարական ներկայացուց։ Այս մասին ան պաշտօնապէս յայտարարեց 27 Օգոստոսին տեղի ունեցած մամլոյ ասուլիսին ընթացքին: Լեւոն Ջուլֆալակեան Հայաստանի հաւաքականը կը գլխաւորէ 1999 թուականէն ի վեր։ 20 տարիներու ընթացքին անոր գլխաւորած հաւաքականի անդամները դարձան ողոմպիական խաղերու, աշխարհի, Եւրոպայի ախոյեաններ եւ մրցանակակիրներ: Անկախ Հայաստանի ամէնէն արդիւնաւէտ մարզիչին օրով Հայաստան 7 անգամ նուաճած է աշխարհի եւ 14 անգամ Եւրոպայի առաջնութեան ոսկի մետալներ:
ՄԻՋԱԶԳԱՅԻՆ
«ՉԵՄՓԻԸՆԶ ԼԻԿ»Ի ՎԻՃԱԿԱՁԳՈՒԹԻՒՆԸ ՄԵԾ ԱՆԱԿՆԿԱԼՆԵՐ ԱՐՁԱՆԱԳՐԵՑ
Հինգշաբթի օր Ֆրանսայի Մոնաքօ քաղաքին մէջ տեղի ունեցաւ 2019-2020 տարեշրջանի «Չեմփիընզ լիկ»ի ֆութպոլի մրցաշարքի խմբակներու մրցումներուն վիճակաձգութիւնը, ուր մասնակից բոլոր խումբերը բաժնուեցան ութը խմբակներու: Սոյն վիճակաձգութեան ուժեղագոյն խմբակը նկատուեցաւ առաջինը, ուր միատեղ գտնուեցան ամէնէն շատ տիտղոս նուաճող Ռէալ Մատրիտը եւ ֆրանսայի բազմակի ախոյեան Փարիզ Սան Ժերմանը: Վիճակաձգութեան պատկերը եղաւ հետեւեալ կազմերով.
Ա. Խմբակ.- Փարիզ Սան Ժերման (Ֆրանսա), Ռէալ Մատրիտ (Սպանիա), Ֆ. Ք. Պրիւժ (Պելճիքա) եւ Կալաթասարայ (Թուրքիա):
Բ. Խմբակ.- Պայերն Միւնիխ (Գերմանիա), Թոթենհամ (Անգլիա), Օլիմփիաքաս (Յունաստան), Կարմիր Աստղ Պելկրատ (Սերպիա):
Գ. Խմբակ.- Մանչեսթըր Սիթի (Անգլիա), Շախտիոր Տոնեցք (Ուքրանիա), Տինամօ Զաղրեպ (Խրուաթիա) եւ Աթալանթա (Իտալիա):
Դ. Խմբակ.- Իւվենթուս (Իտալիա), Աթլեթիքօ Մատրիտ (Սպանիա), Պայէր Լեւերքուզըն (Գերմանիա), Լոքոմոթիւ Մոսկուա (Ռուսիա):
Ե. Խմբակ.- Լիվըրփուլ (Անգլիա), Նափոլի (Իտալիա), Սալզպուրկ (Աւստրիա), Կենք (Պելճիքա):
Զ. Խմբակ.- Պարսելոնա (Սպանիա), Պրուսիա Տորթմունտ (Գերմանիա), Ինթեր Միլան (Իտալիա), Սլաւիա Փրակա (Չեխիա):
Է. Խմբակ.- Զենիթ Ս. Փեթերսպուրկ (Ռուսիա), Պենֆիքա (Փորթուկալ), Լիոն (Ֆրանսա), Լայփցիկ (Գերմանիա):
Ը. Խմբակ.- Չելսի (Անգլիա), Այաքս Ամսթերտամ (Հոլանտա), Վալենսիա (Սպանիա), Լիլ (Ֆրանսա):
ՓԱՐԻԶ ՍԱՆԺԵՐՄԱՆԸ Կ’ՈՒԶԷ ՁԵՌՔ ԲԵՐԵԼ ԵՐԿՐՈՐԴ ԴԱՐՊԱՍԱՊԱՀ ՄԸ
Ըստ վերջին տեղեկութիւններուն, Սպանիոյ Ռէալ Մատրիտի դարպասապահ Քայլըր Նաւաս մօտ ատենէն պիտի միանայ ֆրանսայի ախոյեան Փարիզ Սան Ճերմանի: Քոստարիքացին կրնայ միակը չըլլալ փարիզեան ակումբի դարպասապահերու դիրքին վրայ: Սպանական Marca-ն՝ վկայակոչելով Cadena SER-ը, յայտնեց որ Փարիզ Սան Ժերմանը կը փափաքի երկրորդ դարպասապահ մըն ալ ունենալ, որ կարենայ մրցակցիլ Նաւասի հետ: Հրապարակուած տեղեկութիւններուն համաձայն, Արէոլա կրնայ տեղափոխուիլ Ռէալ Մատրիտ, իսկ Սեվիլիայի դարպասապահ Սերժիօ Ռիքօ կրնայ միանալ փարիզեան խումբին:
ԻՏԸՆ ՀԱԶԱՐՏ ԵՒՐՈՊԱՅԻ ԼԱՒԱԳՈՅՆ ԽԱՂԱՑՈՂԸ ԸՆՏՐՈՒԵՑԱՒ
Եւրոպայի ֆութպոլի դաշնութիւնը անցեալ շաբթուան ընթացքին պելճիքացի Իտըն Հազարտը ընտրեց Եւրոպայի ֆութպոլի ախոյեանութեան լաւագոյն խաղացող: Հազարտ առաջին դիրքը գրաւելով ապահովեց 340 ձայն, անոր յաջորդեց ֆրանսացի Օլիվէ Ժիրոնը՝ 119 ձայնով. Ռէալ Մատրիտի յարձակողական խաղացող Լուքա Եովիչ 94 ձայնով երրորդ դիրքը նուաճեց: Յիշենք, որ ամառնային փոխադրաշրջանին Իտըն Հազարտ Չէլսիէն տեղափոխուեցաւ Ռէալ Մատրիտ փոխան 100 միլիոն եւրոյի:
Պատրաստեց
Ռաֆֆի Սիւլահեան
Ռաֆֆի Սիւլահեան