Պաքալորիան ինծի համար վախազդու տարի մըն էր, բայց ես այդ վախը յաղթահարելու համար պէտք էր յառաջադէմ ուսանող մը ըլլայի:

Այս դժուար ճամբուն վրայ առանձին չքալեցի. ընտանիքս միշտ կողքիս էր, իսկ յուսահատութեան պահերուս ընկերներս կը քաջալերէին:

Նպատակիս հասնելու ճամբուն մեծ էր դպրոցին դերը: Ուսուցիչները իրենց լաւագոյնը կու տային, դաստիարակը՝ պրն. Ներսէսը, եղբօր մը նման կ’օգնէր մեզի, որպէսզի յաղթահարենք դժուարութիւնները:

Չեմ կրնար նկարագրել արդիւնքներու յայտարարուած օրուան ուրախութիւնս: Նպատակիս հասած էի ու արդարացուցած թէ՛ ընտանիքիս եւ թէ դպրոցիս ակնկալութիւնները:

Մեզի յաջորդող սերունդին կը յորդորեմ չվախնալ պաքալորիայէն. անիկա այնքան ալ դժուար չէ, ինչպէս շատեր կը ներկայացնեն: Կարեւորը նպատակիդ հասնելու համար հաստատ քայլերով յառաջանալն է:

Պաքալորիայի տարին կեանքիս ամէնէն դժուար տարիներէն մէկն էր: Բարեբախտաբար լաւ արդիւնքով աւարտեցի զայն:

Մղիչ ուժս նպատակս էր: Մտադրած էի 2300-էն բարձր գնահատանիշ ապահովել: Ամէն անգամ որ տկարանայի կամ յանձնուէի, նպատակս կը մտաբերէի ու կը լծուէի սորվելու հետեւողական աշխատանքի:

Ընտանիքս եւ դպրոցս ամէն ձեւով թիկունք կանգնեցան ինծի: Ուսուցիչներս ոչ մէկ ճիգ խնայեցին իրենց լաւագոյնը տալու համար:

Միակ յորդորը, որ համեստաբար կ’ուզեմ ուղղել այս ծանր բեռը ստանձնողներուն աշխատիլն է: Իւրաքանչիւր աշակերտ աշխատանքով կը հասնի իր ուզածին եւ աշխատանքին համապատասխան արդիւնք կը ստանայ:

Աւարտելով Ազգ. Քարէն Եփփէ Ճեմարանը, շնորհակալութիւն կը յայտնեմ բոլոր անոնց, որոնք թիկունք կանգնեցան ինծի յատկապէս պաքալորիայի դժուար տարուան ընթացքին եւ օգնեցին, որ հաստատաքայլ երթով անցնիմ այս ճամբէն:

Իւրաքանչիւրս իւրովի պէտք է ճշդէ իր նպատակը, առանց ազդուելու այլոց մտքերէն եւ ամբողջ օրը անձնական դասընթացքներով ծանրաբեռնելով: Վարժարանը լաւագոյն ուսուցիչները կ’ապահովէ արդէն, իսկ անոնք որոնք դժուարութիւն ունին կարգ մը նիւթերու ընկալման մէջ, կրնան հետեւիլ միայն տուեալ նիւթերու յատուկ դասընթացքներուն: Ճիշդ չէ անտեսել վարժարանին դերը, այնտեղ տիրող մրցակցութեան առողջ մթնոլորտը շատ դրական, մղիչ ուժ է:

Պաքալորիան կարեւոր տարի է, որովհետեւ այդ տարի կ’ուրուագծուի մեր ուսումնական ապագան:

Շրջապատը մեծ ազդեցութիւն ունի աշակերտին վրայ: Ան կրնայ դրական կամ բացասական դեր ունենալ, քաջալեր հանդիսանալ կամ ճնշելով յուսահատեցնել աշակերտը:

Ուստի, սիրելի ընկերներ, ականջ մի՛ տաք յուսահատական խօսքերով ձեզի դիմողներուն, օրը օրին պատրաստեցէք դասերը եւ ձեզի յատուկ ձեւեր որդեգրեցէք պաքալորիայի ծրագիրը սորվելու համար: Միշտ յիշեցէք, որ դաս պէտք չէ սորվիլ միայն նիշ ապահովելու համար, այլեւ գիտելիք իւրացնելու համար:

Ճեմարանէն շրջանաւարտ դառնալով շնորհակալութիւն կը յայտնեմ վարժարանիս, ուսուցիչներուս եւ ընտանիքիս: Վարժարանիս եւ տանս դրական մթնոլորտը օգնեց, որ հետեւողական աշխատանքով աւարտեմ պաքալորիայի ծրագիրը:

Նպատակս ճշդած էի ու քայլ առ քայլ կ’ընթանայի, միշտ ներքին ձայնիս՝ կամքի ուժիս ականջ տալով:

Բաւական արկածներ անցուցի, անգամ մը ձեռքս, ուրիշ անգամ մը ոտքս կոտրեցի, բայց այս բոլորը չխանգարեցին ընթացքս:Ամէն օր դպրոց եւ դասընթացքի յաճախելով կանոնաւոր կերպով հետեւեցայ ծրագրին եւ աշխատանքիս պտուղը քաղեցի:

Յաջորդ տարուան պաքալորիաներուն սրտանց կը մաղթեմ աննահանջ աշխատանք, որովհետեւ ամէնէն երջանիկ օրը ձեր աշխատանքին արդիւնքին յայտարարութեան օրն է: Այդ օրը դուք պիտի մոռնաք բոլոր դժուարութիւնները եւ հպարտանաք ձեր աշխատաքով: