«Երկիր».-Պաշտօնական այցելութեամբ Վիլնիւս գտնուող արտաքին գործոց նախարար Զոհրապ Մնացականեան 16 Սեպտեմբերին հանդիպում ունեցած է Լիթվիոյ Սէյմասի (խորհրդարանի) խօսնակ Վիկթորաս Փրանցկեթիսի հետ: Հանդիպումին մասնակցած է նաեւ փոխնախագահ եւ եւրոպական հարցերու յանձնաժողովի նախագահ Կետիմինաս Քիրկիլաս:
«Գոհունակութիւն յայտնելով երկու երկիրներու խորհրդարաններուն միջեւ առկայ գործուն երկխօսութեան համար` ԱԳ նախարար Մնացականեան եւ Սէյմասի խօսնակ Փրանցկեթիս շեշտած են խորհրդարանական հարթակի ներուժի լիարժէք կիրառման համար հետեւողական քայլերու որդեգրման անհրաժեշտութիւնը: Նախարար Մնացականեան յայտնած է, որ Վիկթորաս Փրանցկեթիսի յառաջիկայ Հայաստան այցելութիւնը լրացուցիչ խթան կը հաղորդէ խորհրդարանական երկկողմ յարաբերութիւններու ընդլայնումին:
Ներկայացնելով Հայաստանի կառավարութեան առաջնահերթութիւնը հանդիսացող բարեփոխումներու օրակարգը, նախարար Մնացականեան դիտել տուած է, որ կառավարութիւնը հաստատակամ է եւ ունի քաղաքական կամք` կեանքի կոչելու բարեփոխումներու գործընթացը` ուղղուած երկրի ժողովրդավարութեան, օրէնքի գերակայութեան եւ մարդու իրաւունքներու ամրապնդման:
Անդրադառնալով Հայաստանի եւ Եւրոպական Միութեան միջեւ գործընկերութեան` նախարար Մնացականեան կարեւոր համարած է Եւրոմիութեան եւ անդամ պետութիւններուն հետ յարաբերութիւններու իրաւական հիմք հանդիսացող ՀՀ-ԵՄ Համապարփակ գործընկերութեան համաձայնագիրը: Այս առնչութեամբ բարձր գնահատուած է նաեւ Լիթվիոյ կողմէ ՀՀ-ԵՄ համապարփակ գործընկերութեան համաձայնագիրով գործակցութեան խորացման համար ցուցաբերուող աջակցութիւնը:
Հանդիպումին միտքեր փոխանակուած են միջազգային եւ տարածաշրջանային շարք մը հարցերու շուրջ:
Նոյն օրը ԱԳ նախարար Զոհրապ Մնացականեան հանդիպում ունեցած է նաեւ Լիթվիոյ Սէյմասի մէջ գործող ամենամեծ բարեկամական խումբին` Լիթվիա-Հայաստան բարեկամութեան խումբի ղեկավար Կուոտա Պուռոքիենէի եւ խումբի որոշ անդամներուն հետ:
Զրուցակիցները միտքեր փոխանակած են տեղեկատուական միջոցներու, ստեղծարար կրթութեան, բնապահպանութեան եւ բազմաթիւ այլ ոլորտներէն ներս գործակցութեան եւ երկիրներու փորձի փոխանակման հեռանկարներուն շուրջ:
ԱԳ նախարարը խորհրդարանականներուն ներկայացուցած է Հայաստանի արտաքին քաղաքական առաջնահերթութիւնները, Լեռնային Ղարաբաղի հիմնահարցի խաղաղ կարգաւորման գործընթացին մէջ Հայաստանի սկզբունքային դիրքորոշումը եւ մօտեցումները: Զրուցակիցները հաստատած են, որ հիմնահարցի խաղաղ կարգաւորումը այլընտրանք չունի», յիշուած է հաղորդագրութեան մէջ: