«Երկիր».-Թուրքիոյ մայրաքաղաք Անգարայի մէջ 16 Սեպտեմբերին հանդիպած են Ռուսիոյ նախագահ Վլատիմիր Պութին, Իրանի նախագահ Հասան Ռոհանի եւ Թուրքիոյ նախագահ Ռեճէպ Թայիպ Էրտողան:
Հանդիպումին ընթացքին քննարկուելիք հարցերու մասին Թուրքիոյ նախագահի մամուլի կեդրոնը յայտնած է, որ նպատակը Սուրիոյ մէջ տեղի ունեցող զարգացումները գնահատել է, յատկապէս` Իտլիպի առնչութեամբ, ապահովելու հարցերուն լուծման նպաստող պայմաններ, վերջ դնելու բախումներուն եւ կարելիութիւններ ստեղծելու փախստականներուն կամաւոր վերադարձին համար:
Նախատեսուած է նաեւ, եռակողմ գագաթնաժողովէն բացի, իրականացնել երկկողմ հանդիպումներ` երկկողմ յարաբերութիւններուն եւ միջազգային օրակարգին առնչուող հարցեր քննարկելու նպատակով:
Թուրքիոյ նախագահի կայքին մէջ հրապարակուած տեղեկութեան համաձայն, Էրտողան նախ պիտի հանդիպի Իրանի նախագահին, այնուհետեւ Ռուսիոյ նախագահին հետ, իսկ տեղական ժամով ժամը 15:30-ին տեղի պիտի ունենայ եռակողմ հանդիպումը: