«Էրմէնիհապեր».-Կիպրոսի նախագահ Նիկոս Անասթասիատիս յայտարարած է, որ կը պատրաստուի ՄԱԿ-ի Գլխաւոր հաւաքին 74-րդ նիստին Թուրքիոյ հարցը վեր առնել:
Կիպրոսի նախագահը մտադիր է Թուրքիոյ միջազգային հանրութեան կողմէ արժանի պատասխան ստանալ Կիպրոսի դէմ իրականացուող գործողութիւններուն համար:
Անասթասիատիս նաեւ նշած է, որ համապատասխան քայլեր պիտի ձեռնարկուին Անգարայի որոշման դէմ, որուն համաձայն` Կիպրոսի թրքական հատուածին մէջ գտնուող Վարոշա քաղաքը պէտք է բացուի կիպրոսաբնակ թուրքերուն եւ զբօսաշրջիկներուն առջեւ: Կիպրոսի նախագահի պնդումով` Թուրքիոյ այդ նախաձեռնութիւնը կը հակասէ ՄԱԿ-ի որոշումներուն:
Անասթասիատիս շեշտած է, որ յառաջիկայ օրերուն իր գլխաւոր առաքելութիւնը պիտի ըլլայ Թուրքիոյ սադրիչ գործողութիւններուն պատասխանել․ «Ես այդ նպատակին համար պիտի օգտուիմ ՄԱԿ-ի մէջ իմ ներկայութենէն, ՄԱԿ-ի իմ ելոյթը լիովին պիտի նուիրեմ այս հարցին եւ պիտի հանդիպիմ ՄԱԿ-ի Անվտանգութեան Խորհուրդի անդամ հինգ երկիրներու ներկայացուցիչներուն եւ ՄԱԿ-ի գլխաւոր քարտուղարին հետ», յայտարարած է ան: