«Երկիր».- yeniyasamgazetesi1.com կայքը կը հաղորդէ, որ Տիարպեքըրի Հազրօ շրջանին մէջ գտնուող Չիթլիպահչէ գիւղին մէջ հայերու կողմէն 200 տարի առաջ կառուցուած աղբիւրը կը շարունակէ հոսիլ: Ցեղասպանութեան զոհ դարձած եւ արտաքսուած հայերուն ջանքերով կանգուն մնացած պատմական յուշարձաններէն է այս աղբիւրը, որ կառուցուած է 1802-ին: Մօտաւորապէս 200 տարի անդադար հոսող այս աղբիւրէն գիւղացիները եւ՛ ջուր կը խմեն, եւ՛ դաշտերը կ՛ոռոգեն:
Գիւղի բնակիչներէն` 58-ամեայ Շահապըտտին Տաշլըք յայտնած է . «Մօտաւորապէս 200 տարի է ի վեր աղբիւրը կը շարունակէ հոսիլ: Երբ գիւղին մէջ երաշտի պատճառով գետերը կը ցամքին, այս աղբիւրը կը շարունակէ հոսիլ: Աղբիւրը հայերը կառուցած են: 1915-ին, Հայոց Ցեղասպանութեան օրերուն, մեր գիւղին մէջ գտնուող հայերը կոտորածի ենթարկուած են: Գիւղի ետեւի մասը գտնուող դաշտերուն մէջ բոլորը սպանուած են: Հիմա ոչ մէկ հայ մնացած է»: