«Ապառաժ».- 1 Հոկտեմբերին ՀՀ Կրթութեան, Գիտութեան, Մշակոյթի եւ Մարմնամարզի Նախարարութեան, Արցախի Հանրապետութեան Մշակոյթի, Երիտասարդութեան եւ Զբօսաշրջութեան Նախարարութեան նախաձեռնութեամբ Ստեփանակերտի երիտասարդութեան պալատէն ներս ‹‹Կոմիտաս›› միջազգային փառատօնի յոբելինական տարուան համերգային ծրագիրով հանդէս եկած են Հայաստանի ազգային ակադեմական եւ ‹‹Հովեր›› պետական երգչախումբերը, ‹‹Գեղարդ›› երգեցիկ խումբը, անուանի արուեստագէտներ եւ երաժիշտներ: Համերգաշարին նպատակն էր շեշտել հայկական երկու հանրապետութիւններու մշակութային բացարձակ միատարրութիւնը:
Հայաստանի պետական երգչախումբի գեղարուեստական ղեկավար Ռոպերթ Մլքէեան ըսած է, որ արդէն 10 տարի է Արցախի մէջ են. ‹‹Ամեն տեղ հայը պէտք է գիտակցի, որ մեր ազգի մեծագոյն պարծանքը Կոմիտասն է: Վարդապետը անգնահատելի մեծ ժառանգութիւն թողած է հայ ազգին: Ան հայ երաժշտութիւնը մաքրազարդեց եւ ստեղծեց ակադեմական դպրոց` առանձնացնելով հայը այլ ազգերէ: Մենք ունինք կոմիտասեան երաժշտութիւն, որ ամբողջ աշխարհը կը լսէ, որպէս բացառիկ ակադեմական երաժշտութիւն»:

Յասմիկ Յակոբեան