ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄՆԻ ԱՆԴԱՄ ՇԱՂԻԿ ՄԱՐՈՒԽԵԱՆ ԱՐԵՒԵԼԵԱՆ ԱՄՆ ԱՅՑԵԼԵՑ

0

«Հայրենիք».-ՀՅԴ Կեդրոնական Կոմիտէի եւ ՀԵԴ Կեդրոնական Վարչութեան հրաւէրով, ԱՄՆ Արեւելեան շրջան այցելեց ՀՅԴ Հայաստանի Գերագոյն Մարմինի անդամ՝ Շաղիկ Մարուխեան: Շաղիկ Մարուխեանին պիտի ընկերակցէր նաեւ ՀՅԴ Գերագոյն Մարմնի անդամ Արթուր Խաչատրեան, բայց ընկերոջ հօր մահուան տխուր պատճառով, ընկերը չկրցաւ ժամանել:

Այցելութեան առաջին օրը, 26 Սեպտեմբերին, Կեդրոնական Կոմիտէի անդամներ՝ Անի Չաղլասեանի եւ Վալոտ Աթախանեանի ուղեկցութեամբ, Շաղիկ Մարուխեան այցելեց Արեւելեան Թեմի Ազգային Առաջնորդարան, ուր դիմաւորուեցաւ Թեմի Առաջնորդ Գերշ. Անուշաւան Արք. Դանիէլեանի կողմէ: Հիւրերը Սրբազան Հօր հետ զրուցեցին Հայաստանի, սփիւռքի եւ հայ եկեղեցուոյ առնչուող տարբեր հարցերու շուրջ:

Նոյն օրը, երեկոյեան, Մարուխեան ընկերական հանդիպում մը ունեցաւ Նիւ Եորքի եւ Նիւ Ճըրզիի գաղափարակից ընկերներուն հետ, ուր զեկուցեց Հայաստանի քաղաքական, տնտեսական ու ընկերային ներկայ կացութեան մասին, ներկայացուց ՀՅԴ Հայաստանի Գերագոյն Մարմինի աշխատանքներն ու ծրագիրները եւ սպառիչ կերպով պատասխանեց ընկերներուն յուզող բազմաթիւ հարցումներուն:

Շաբաթավերջին, Շ. Մարուխեան մէկ ու կէս օր անցուց Մասաչուսէցի Մարլպօրօ քաղաքին մէջ հաւաքուած երէց ՀԵԴ-ականներու հետ: Ներկայ էին նաեւ ՀԵԴ-ականներ Քանատայէն եւ ԱՄՆ Արեւմտեան ափէն: Յատուկ զեկոյցով մը, ՀՅԴ Հայաստանի Գերագոյն Մարմնի անդամը ներկայացուց Հայաստանի քաղաքական, տնտեսական ու ընկերային ներկայ կացութիւնը, ՀՅ Դաշնակցութեան տեսակէտներն ու այլընտրանքային ծրագիրները, ՀՅԴ սփիւռքահայ կառոյցներէն, մասնաւորաբար երիտասարդութենէն սպասուած ակնկալիքները եւ Հայաստանի ու հայութեան դիմագրաւած դժուարութիւններն ու վտանգները:

30 Սեպտեմբերին, Պոսթընի «Բաբգէն Սիւնի» ակումբին մէջ, Մարուխեան հանդիպում ունեցաւ ՀՅԴ Պոսթընի, Փրովիտէնսի, Ուսթըրի եւ Լօուըլի կոմիտէութիւններու ընկերներուն հետ, ուր ամփոփ զեկոյցէ մը վերջ, ան պատասխանեց ընկերներու բազմաթիւ հարցումներուն:

Share.

Leave A Reply