Հանրապետութեան նախագահ Արմէն Սարգսեան շնորհաւորական ուղերձ յղած է Երեւանի օրուան առիթով: Ուղերձին մէջ յիշուած է.
«Սիրելի՛ երեւանցիներ,
Սիրելի՛ հայրենակիցներ աշխարհի տարբեր կողմերում,
Երեւանի յարգելի՛ բարեկամներ ու հիւրեր,
Այսօր ամենայն հայոց մայրաքաղաքի տօնն է` Երեւանի օրը:
Մեզնից իւրաքանչիւրն ունի իր Երեւանը, որոնք միանում ու դառնում են մէկն ու միակը:
Երեւանը բոլորինս է, աշխարհի որ կէտում էլ գտնուենք:
Երեւանի պատմամշակութային ժառանգութիւնը մեր արժէքների անբաժանելի մասն է: Այն պէտք է պահպանել ու փոխանցել սերնդեսերունդ` որպէս հպարտութիւն, որպէս ազգային կենսունակութեան վկայութիւն, ոգեշնչման անփոխարինելի աղբիւր:
Երեւանը կարելի՛ է սիրել եւ պէ՛տք է սիրել նաեւ նրա հանդէպ հոգատար ու սրտացաւ լինելով:
Երեւանը միայն արտաքուստ է քարի քաղաք: Իրականում այն չափազանց նուրբ է ու զգայուն:
Երեւանը յիշողութիւն ունի:
Երեւանը լայնաժպիտ կանչում ու մեծահոգաբար ընդունում է բոլորիս:
երեւանը ներողամիտ է, նոյնիսկ նրա հանդէպ, ով նեղացած կամ տխուր է հեռացել` մէկ օր, մէկ ժամ, մէկ տարի կամ երեսուն տարի առաջ:
Երեւանն այսօր եւս մէկ էջ է աւելացնում շուրջ երեքհազարամեայ իր պատմութեանը: Այդ պատմութիւնը գրւում է ամէն մէկիս միջոցով` մեր աշխատանքի, մեր վերաբերմունքի, արարումի, խոհի միջոցով` հայրենիքում կամ նրա սահմաններից դուրս:
Սիրե՛նք Երեւանը, ամէն Աստուծոյ օր մի միտք, մի երազանք, մի գաղափար յղանանք, դրանք գործ ու իրականութիւն դարձնենք` յանուն Երեւանի ու երեւանցու, յանուն Հայաստանի եւ համայն հայութեան:
Տօնդ շնորհաւոր, Երեւա՛ն, իմ սէր»: