Մարդկային ընկերութիւններէ ներս փոփոխութեանց իրագործումը կը համարուի բարդ եւ տագնապալի հարց մը, որովհետեւ մարդ էակը բնազդաբար կը նախընտրէ ընթացիկը, ծանօթը, ընտանին, հեզասահը, ոչ-տաղտկալին, փորձուածը, անցեալէն կտակուածը… Մինչ տարակուսանքով կը մօտենայ ամէն երեւոյթի որ արտասովոր է, անծանօթ, անհարթ, անորոշ, տաժանելի, փոթորկոտ եւ ցնցիչ։
Ժողովուրդներու կենցաղին մէջ արմատ նետած բազում սովորութիւններ, անկախ իրենց օգտագործումէն թէ վնասակարութենէն, տրամաբանական կամ անտրամաբանական ըլլալու հանգամանքէն իբրեւ անձեռնմխելի եւ անվերատեսելի ժառանգութիւններ երկար ատեն գոյատեւած են զիրենք ստեղծող զանգուածներու կեանքին մէջ՝ փոխանցուելով դարէ-դար եւ սերունդէ-սերունդ։
Վերադառնալով պատմութեան, պիտի նկատենք, որ կրօնական տարբեր վարդապետութիւններ իրենց քարոզչական եւ զինեալ արշաւներով յաճախ յաջողած են նուաճել շատ մը ժողովուրդներու խիղճն ու հոգին եւ փոխել անոնց հաւատքն ու կրօնը, սակայն առհասարակ ձախողած են արմատախիլ ընել կամ փոփոխութեան ենթարկել անոնց աւանդութիւններն ու սովորութիւնները։ Հոգեւոր շարժումներ շօշափելով այն ջերմ սէրն ու աներկբայ համարումը, զորս մարդիկ կը տածեն իրենց աւանդութեանց եւ բարքերու նկատմամբ, յարմար դատած են կրօնական այլատեսակ ծէսեր եւ արարողութիւններ պատշաճեցնել վերոյիշեալ աւանդութեանց ու սովորութեանց՝ խուսափելով համաժողովրդային բուռն հակազդեցութենէ ու մեծ տարողութեամբ նպաստաւորուելով անոնց պատմամշակութային արժէքէն։
Արդարեւ՝ Ժամանակի թաւալումին հետ այդ սովորութիւնները զգեցած են տեսակ մը սրբութիւն եւ վերածուած հանրամշակութային հարուստ ժառանգութեան, որ մեծ գուրգուրանքով ու նախանձախնդրութեամբ պահպանուած է ժողովուրդին կողմէ՝ արժանանալով անոր անխառն պաշտամունքին, եւ որպէս մասունք կտակուելով հետագայ սերունդներուն։
Այս բոլորով հանդերձ՝ վերափոխութիւնը կը հանդիսանայ մարդկային կեանքի բարեշրջման, յարաճուն վերելքին եւ ժամանակակից տարրերով պատուաստումին սատարող հիմնական ու անհրաժեշտ ազդակ մը, որ կը մերժէ ժամանակավրէպը, լճացածը, անօգուտը եւ անընդունելին։
Փոփոխութիւնը, սակայն, պատահական երեւոյթ պէտք չէ ընդունիլ, այլ՝ լուրջ, յախուռն, արկածալի եւ ճակատագրական գործընթաց մը, որ արդիւնաւէտ եւ նպատակասլաց պիտի չըլլայ եթէ ենթահող չունենայ բարոյական, ընկերային, քաղաքական, տնտեսական եւ հոգեբանական հիմնահարցերու խորունկ ըմբռնողութիւնը, միաժամանակ՝ եթէ չօգտագործէ բծախնդիր եւ ճշգրիտ արժեչափեր կամ եթէ չգոյացնէ յստակ պատկերացումներ հասարակական նկրտումներու եւ նպատակաուղղուածութեան կապակցաբար։
Բնականաբար բարենորոգումը պէտք է ընդգրկէ այն բոլոր երեւոյթները, որոնք կը խոչընդոտեն կեանքի բնականոն ընթացքը, կը սանձեն յառաջդիմութիւնը, չեն ներդաշնակուիր դարու ոգիին հետ, գոհացում չեն տար մարդոց կարիքներուն, ձգտումներուն եւ ապագայ հեռանկարներուն։
Այսօր վճռորոշ դերակատարութիւն վերապահուած է ժամանակի գործօնին։ Արդ՝ երկրագունդի տարածքին դէպքերու սրընթաց յաջորդականութիւնը, ինչպէս նաեւ գիտական եւ արհեստագիտական բնագաւառներէն ներս օրն ի բուն արձանագրուող հսկայաքայլ յառաջխաղացքը, վերափոխումը կը դարձնեն անյետաձգելի եւ հրատապ անհրաժեշտութիւն, որով պատեհութիւն պիտի ընծայուի մարդուն, արժանաւորապէս բարեկարգելու սեփական կեանքը՝ վերանորոգ մտածողութեամբ եւ վերաորակաւորեալ կարելիութիւններով։
Որեւէ փոփոխութիւն անշուշտ միշտ ալ կը ներփակէ վտանգ, անորոշութիւն, անկանխատեսելի հետեւանքներ, անստոյգ արդիւնքներ եւ մինչեւ իսկ ձախողութեան։
Տարօրինակ չէ ուրեմն՝ որ քաղաքակիրթ, բայց պահպանողական շատ մը ընկերութիւններ, որոնք կը սնանին անցեալի հարստութեամբ եւ կը պարծենան իրենց կորած փառքերով, աւելի ապահով, աւելի բարենպաստ եւ աւելի խելացի կը դասեն պահպանել իրենց ներկայի կայուն եւ անխռով կացութիւնը, հեռու վանելով պատմական իրադարձութիւններ վերծանելու, անցեալէն դասեր քաղելու եւ ապագայի կերտման ի խնդիր երկարաշունչ, տաժանակիր եւ փորձանաւոր աշխատանքի ձեռնարկելու արկածախնդրութիւնը։
Սակայն իրականութեան մէջ մեծագոյն վտանգը կը սպառնայ այն ժողովուրդներուն, որոնք ծանօթ չեն մերդարեայ արդի մտածողութեան, վարակուած չեն ժամանակակից նորարար շունչով, նաեւ քայլ չեն պահեր յարատեւօրէն ծաղկող ու բարգաւաճող աշխոյժ ընկերութիւններու հետ։ Մանաւանդ այս օրերուն՝ երբ այդ համաքայլ ընթացքն ու մօտեցումը դարձած են կենսական նախապայմաններ ճակատաբացօրէն գոյատեւելու այն հաւաքականութեանց շարքին, որոնց համար վերափոխումը կը նկատուի անշրջանցելի եւ յոյժ էական միջոցառում՝ հասնելու համար դէպի լուսաւոր ապագայ սուրացող համաշխարհային կառախումբին։
Հաւանաբար շատեր նախապատիւ սեպեն կառչած մնալ անցեալին եւ անտեսեն՝ վարդագոյն ապագայի խոստումնալի կոչը, մեկնելով այն վարկածէն, որ որեւէ արդիւնարար բարեշրջում կ’ենթադրէ անընկճելի կամք, անսպառ կորով, հետեւողական ճիգեր, բազում զոհողութիւններ, ու մասնաւորաբար՝ համակողմանիօրէն ծրագրուած խստաբարոյ, եռանդուն եւ բեղմնաւոր գործելաձեւ, որոնք անմիջականօրէն տրամադրելի չեն իրենց։
Այսպէս՝ վերոյիշեալ հանգամանքները կը թելադրեն մեզի չվախնալ եւ չխուսափիլ վերափոխումի ջահակիրներէն՝ ոչ ալ կործանարարներ ու դաւաճաններ որակել զանոնք, այլ՝ առանց վերապահութեան քաջալերել, մեծարել ու գնահատել այդ խիզախ մարդիկը, որոնք անընդմէջ կը ճգնին յեղաշրջել եւ բարւոքել ժողովուրդներու հետեւողականօրէն տժգունող միապաղաղ կեանքը։ Որովհետեւ՝ փոփոխութիւնը ի վերջոյ շարժում կը նշանակէ, իսկ շարժումը կեանք կը բովանդակէ, մինչդեռ՝ անշարժութիւնն ու լճացումը մահուան ամենացայտուն ցուցանիշներն են։
Ուրեմն՝ անվարանօրէն ողջունենք եւ խրախուսենք մարդկային կեանքի վերափոխման եւ բարեշրջման հեռանկարով յանդգնութեամբ ձեռնարկուած այլաբնոյթ հանրօգուտ նախաձեռնութիւնները, ինչպէս նաեւ անշահախնդրօրէն հասարակութեան դատին նուիրուած բոլոր վեհանձն բարեկարգիչները, եւ այդ՝ տեւաբար զօրակցելով ու հնարաւոր բոլոր միջոցներով օժանդակելով անոնց։
Խաչիկ Շահինեան