Կ’արթննաս գիշերուան պատրաստութիւն տեսնելու համար, մեծ տօնը յիշատակելու համար, կը բանաս պահարանդ ու կ’ընտրես ամենագեղեցիկը, կը հագուիս, կը զարդարուիս, կը պատրաստուիս այդ գալիքին։ Ամբողջ օրը ուրախ ես, քանի վստահ ես, որ անտարակոյս գալու է այդ մէկը։ Նուէրներ կ’առնես. նուէրներ՝ քեզի եւ հարազատներուդ։
Ուրախ ես, եւ ինչպէ՞ս ուրախ չըլլաս։ Ուրախութիւն կը ստանաս՝ զայն տալով ուրիշին։ Ուրախութիւնը չի խլուիր, ուրախութիւնը կը տրուի, իսկ ստացողը նոյնինքն տուողն է, ուստի հարազատներուդ նուէրները կը գերազանցեն նուէրներդ։ Մեծ օր է այսօր։ Յոյսի նշոյլներ, ուրախութեան պերճանք, հարազատներով շրջապատուած անվերջ խնճոյք, քէֆ ու ծիծաղ ամէն կողմ։ Օրուան ընթացքին կը շնորհաւորես բոլորը ու բոլորը կը շնորհաւորեն քեզ փոխադարձաբար։ Կը նկարուիս աջ ու ձախ, մերթ հարազատներ գրկած եւ մերթ մինակ՝ ինքզինքդ իւրայատուկ համարելով։ Երաժշտութեան ձայնը կը բարձրացնես մինչեւ վերջ: Մինակ եւ ուրախ՝ կը պարես անվերջ։ Խմիչքն անպակաս՝ կը քաշես գլխուդ, կենացը կը խմես հեռու հարազատներուդ։ Կը յիշես բոլոր, բոլոր անոնք, որոնք եկան ու անցան շատոնց։ Բայցեւայնպէս կը մնաս ուրախ, ուրախ կը մնաս բոլորին ի տես։ Ու կու գայ սլաքը սլաքին, երկուքը ցիցի պէս դէպի վեր կ’ուղղուին։ Կ’աւետեն նոր օրը, որուն առտուընէ կը սպասէիր։ Նոր օրուան կը սպասէիր, որովհետեւ նոր տարին 365 օրէն կու գայ, մինչդեռ նոր օրը 24 ժամէն։ Նոր օրուան կը սպասէիր, որովհետեւ զայն տօնելու 365 առիթ կայ, մինչդեռ նոր տարին՝ առիթ մը 365 օր անգամ մը։ Եւ ահա եկաւ քու սպասածը, ամբողջ օրը քեզ յոյս տուողը։ Ահա՛, նոր օրուան առիթով կը խոստանաս ինքդ քեզ՝ ըլլալ աւելի յաջողակ, աւելի վճռակամ։ Այո՛… Եւ այսպէս ամէն օր Նոր Օրը կը տօնես։ Յոյսը միշտ սրտիդ մէջ, ժպիտը դէմքիդ վրայ եւ խաղաղութիւնը բովանդակ հոգիիդ մէջ։ Նոր Օրը կը տօնես, իսկ Նոր Տարին տօնելը կը ձգես սովորականներուն։
Քրիստ Խրոյեան