Նախագահ Բակօ Սահակեան 10 Դեկտեմբերին շնորհաւորական ուղերձ յղած է ԼՂՀ պետական անկախութեան հանրաքուէի եւ Սահմանադրութեան օրուան առիթով:
Ուղերձին մէջ յիշուած է.
<<Սիրելի՛ արցախցիներ,
Հանրապետութեան իշխանութիւնների եւ անձամբ իմ անունից ի սրտէ շնորհաւորում եմ պետական կարեւորագոյն տօնի` ԼՂՀ պետական անկախութեան մասին հանրաքուէի եւ Սահմանադրութեան օրուայ առթիւ:
Թէ՛ 1991 թուականին եւ թէ 2006 թուականին այս օրը մեր ժողովուրդը կատարեց պատմական ընտրութիւն` իր ձայնը տալով` յանուն ազատ ու անկախ Արցախի, յանուն ժողովրդավարական, իրաւական ու սոցիալական (ընկերվարական«Գ.») պետութիւն կառուցելու անսասան որոշման:
Մեր պետականաշինութեան ճանապարհին կարեւոր քայլ էր երկրի հիմնական օրէնքի` Սահմանադրութեան ընդունումը, որի հիմքում մարդն է, նրա իրաւունքների, ազատութիւնների ու շահերի պաշտպանութիւնը: Սրանք համամարդկային արժէքներ են, որոնք կարեւոր են քաղաքացիական հասարակութեան ու ժողովրդավարական ինստիտուտների կայացման համար:
Եւ արդէն 28 տարի է` մենք ընթանում ենք այս ճանապարհով` օր օրի զարգացնելով ու զօրացնելով մեր երկիրը, ամրապնդելով պետականութեան հիմքերն ու ժողովրդի անվտանգութիւնը, բարելաւելով մարդկանց կենսապայմանները: Սա բարդ ու անհարթ ճանապարհ է, որը մեր ժողովուրդն անցնում է պատուով ու արժանապատուութեամբ` անձնուիրաբար յաղթահարելով բոլոր դժուարութիւններն ու փորձութիւնները:
Թանկագի՛ն հայրենակիցներ,
Մէկ անգամ եւս շնորհաւորում եմ բոլորիս այս նշանակալի տօնի կապակցութեամբ եւ մաղթում խաղաղութիւն, քաջառողջութիւն, մեծագոյն յաջողութիւններ` ի փառս Արցախի Հանրապետութեան ու մեր ժողովրդի>>:

ԱՐՑԱԽԻ ՀԱՆՐԱՊԵՏՈՒԹԵԱՆ ՆԱԽԱԳԱՀԻ ԱՇԽԱՏԱԿԱԶՄԻ
ՏԵՂԵԿԱՏՈՒՈՒԹԵԱՆ ԳԼԽԱՒՈՐ ՎԱՐՉՈՒԹԻՒՆ