ԱՏՐՊԷՅՃԱՆԱԿԱՆ ԿԵՂԾԱՐԱՐՈՒԹԵԱՆ ՀԵՏՔԵՐՈՎ…

0
Զօրավար Սուլէյմանիի զոհուելուց յետոյ Իրանում խոր ցասումի ու սգոյ պայմաններում, ահա, ատրպէյճանական մամուլը իւրայատուկ քստմնելիութեամբ «տեղեկատուութիւն» է տարածում ու պահի չարաշահմամբ՝ հակահայ քարոզչութիւն իրականացնում, թէ իբր ՀՀ վարչապետը շնորհաւորել է ԱՄՆ նախագահը՝ Պաղտատում վերջին գործողութիւնների կապակցութեամբ…
Ճիշդ է, ՀՀ վարչապետն իր «ֆէյսբուք»եան էջում անմիջապէս հերքել ու դատապարտել է այդ կարգի լրատուութիւնը, քաջ գիտակցելով, որ հարեւան ու բարեկամ Իրանի պետական-կառավարական այրերը խելամտօրէն զանազանում են իրականը՝ կեղծից, տեղեկատուութիւնը՝ ապատեղեկատուութիւնից…:
Բարոյական նուազագոյն օրինաչափութիւններից զուրկ ատրպէյճանական քարոզչամեքենաներին ու սրանց լծակից՝ Իրանի հողային ամբողջականութեան դէմ «Հարաւատրպէյճանական»ամէտ խրտուիլակներին, սակայն, յիշեցման կարգով յայտնենք.-
1- Ո՞ւր էիք դուք, երբ տարիներ շարունակ ՄԱԿ-ին կից, թէ՛ միջազգային այլեւայլ ատեաններում հակաիրանեան բանաձեւերին նոյնինքն Ատրպէյճանն ու իր աւագ եղբայր Թուրքիան թեր էին քուէարկում, իսկ Հայաստանը՝ դէմ: Վերջին, այդ կարգի քուէարկութիւն կայացել է հէնց սրանից 10 օր առաջ, որտեղ Թուրքիան ու Ատրպէյճանը ձեռնպահ, իսկ Հայաստանը դէմ էր քուէարկել:
2- Ո՞ւր էիք դուք, երբ ձեր իսկ ջատագովող Ատրպէյճանից իսրայէլական անօդաչու թռչող սարքերը իրանական երկնքում «հետախուզական» թռիչքներ էին իրականացնում…
3- Եւ վերջապէս, ո՞ւր էիք դուք, երբ ձեր աւագ եղբայր Թուրքիայի նախագահ Էրտողանը նոյնինքն՝ զօրավար Սուլէյմանիի Սիրիայում ու Իրաքում հակա-ՏԱՀԵՇ-ական յաղթարշաւի օրերին իսկ, ի լուր աշխարհի «ահազանգում» էր, թէ՝ «Իրանը շիիզմ է արմատաւորում տարածաշրջանում»…:
4- Եւ այսօր, ձեր երկրպագող Թուրքիայի նախագահն ու վերջինիս կրտսեր եղբայր Ատրպէյճանի արտգործնախարարը մեծ աճապարանքով ցաւակցում են հակա-ՏԱՀԵՇ եւ կարեւորը՝ Իրանի հողային ամբողջականութեան անվտանգութեան ու պահպանման առաջամարտիկի ու խորհրդանիշի՝ զօրավար Սուլէյմանիի կորուստը…:
Ցաւակցութիւնը՝ ցաւակցութիւն, փրոթոքոլն ու արարողակարգը՝ տեղին, բայցեւայնպէս՝ բարոյականութիւնն ու անկեղծութիւնը ապացուցելի չեն սուտ լրատուութեամբ ու քարոզչական սադրանքով, իսկ դրանք երբեւէ չեն վրիպելու հանրային եւ տուեալ դէպքում սգակիր իրանցու խորաթափանց գիտակցութիւնից…:
Դերենիկ Մելիքեան
Share.

Leave A Reply