ՀԱՅ ԴԱՏԻ ՅԱՆՁՆԱԽՈՒՄԲԸ ՀԱՆԴԻՊԵՑԱՒ ՔԱՆԱՏԱՅԻ ԺԱՌԱՆԳՈՒԹԵԱՆ ՆԱԽԱՐԱՐ ՍԹԻՎԸՆ ԿԻԼՊՈՅԻ ՀԵՏ

0

«Հորիզոն».-Ուրբաթ, 31 Յունուար, 2020-ին, Քանատայի Հայ Դատի Շրջանային եւ Քէպէքի տեղական յանձնախումբերը ներկայացնող միացեալ պատուիրակութիւն մը հանդիպում ունեցան Քանատայի նորանշանակ Ժառանգութեան Նախարար Սթիվըն Կիլպոյի հետ:

Պատուիրակութեան մաս կը կազմէին Օթթաուայի գրասենեակի գործավար Սեւակ Պէլեան, Շրջանային յանձնախումբի անդամ Հրակ Չինչինեան, Մոնթրէալի Հայ Դատի յանձնախումբի ատենապետուհի Արփի Պալուզեան եւ յանձնախումբի անդամ Աբրահամ Նիզիպլեան:
Հանդիպումի ընթացքին, Հայ Դատի ներկայացուցիչները նախարարին համապարփակ ձեւով ներկայացուցին քանատահայութեան պատմութիւնն ու Հայ Դատի գործունէութիւնը, ինչպէս նաեւ առիթը ունեցան անոր հետ քննարկելու շարք մը կարեւոր հարցեր:
Քննարկումի առարկայ դարձան Ցեղասպանութեանց յիշատակման, դատապարտման եւ կանխարգիլման ամսուան աշխատանքները, Գանատա-Հայաստան երկկողմանի յարաբերութիւնները, ցեղասպանութեան ուսուցման կարեւորութիւնը եւ Քանատայի մէջ առցանց ատելութեան եւ ցեղապաշտութեան դէմ պայքարի գործընթացն ու Հայ Դատի յանձնախումբի տարած աշխատանքը այդ ուղղութեամբ:
Նախարարը իր կարգին գնահատանքով արտայայտուեցաւ գանատահայութեան եւ Հայ Դատի յանձնախումբի գործունէութեան մասին եւ իր ամբողջական պատրաստակամութիւնը յայտնեց վերոնշեալ հարցերու շուրջ համագործակցելու ուղղութեամբ:

Share.

Leave A Reply