ՀՅԴ Հայ Դատի Կեդրոնական Խորհուրդը հաղորդագրութեամբ մը ողջունեց Սուրիոյ խորհրդարանին` հայոց դէմ գործադրուած Ցեղասպանութեան բանաձեւի որդեգրումը եւ շնորհաւորեց սուրիահայութիւնը այս կարեւոր իրագործումին առիթով:
«Յատուկ շնորհակալութիւն Սուրիոյ իշխանութեան ու մանաւանդ ասպնջական ժողովուրդին, որ ապաստան շնորհեց Ցեղասպանութենէն ճողոպրած մնացորդացին:
«Սուրիոյ կողմէ այս ճանաչումը եւ դատապարտումը կրկնակի կարեւորութիւն ունի, որովհետեւ սոսկ իրողութեան հաստատումէն անդին կ՛անցնի, կը վկայէ Սուրիոյ ժողովուրդի ականատես ըլլալու հանգամանքը` Թուրքիոյ կողմէ իր իսկ հողերուն վրայ գործադրուած մեծ ոճիրին եւ կոչ կ՛ուղղէ` պայքարելու ժխտումի քաղաքականութեան դէմ:
«Շնորհակալութիւն մանաւանդ Սուրիական-Հայաստանեան խորհրդարանական Բարեկամական յանձնաժողով»-ին եւ անոր նախագահ դոկտ. Նորա Արիսեանին, որոնք նախաձեռնեցին այս բանաձեւի գործընթացին օրէնսդիր պալատին մէջ:
«Այս մեծ յաղթանակին համար կրկին կը շնորհաւորենք սուրիահայութիւնը, Սուրիոյ խորհրդարանի հայազգի պատգամաւորները եւ Հայ դատի բոլոր նուիրեալները», ըսուեցաւ հաղորդագրութեան մէջ: