ՏԵՂԱԿԱՆ
ԼՈՒՐԵՐ ՍՈՒՐԻՈՅ ՄԱՐԶԱԿԱՆ ԿԵԱՆՔԷՆ
– Սուրիոյ ֆութպոլի Բ. դասակարգի ախոյեանութեան մրցումներու շրջագիծին մէջ, ՀՄԸՄ-ի ֆութպոլի երիտասարդական խումբը 3-0 արդիւնքով պարտութեան մատնեց Աֆրինը, իսկ տղոց առաջին խումբը 2-0 արդիւնքով զիջեցաւ Նէյրապին:
– Կիրակի առաւօտուն, Դամասկոս ժամանեցին Սուրիոյ ֆութպոլի հաւաքականի նորանշանակ մարզիչ Նապիլ Մաալուլը եւ իր երկու օգնականները: Դամասկոսի միջազգային օդակայանին մէջ զիրենք դիմաւորեց Սուրիոյ Ֆութպոլի Դաշնութեան նախագահ Հաթէմ Ղայէպը:
– Սուրիոյ ֆութպոլի եւ պասքեթի դաշնութիւնները Կիրակի օր մէկ ամսուան տեւողութեամբ դադրեցուցին երկրին բոլոր մարզական մրցաշարքերը՝ պսակաձեւ ժահրէն (քորոնա) խուսափելու համար:
ՀԱՅԿԱԿԱՆ
ԼՈՅՍ ԱՇԽԱՐՀ ԵԿԱՒ ՀԵՆՐԻԿ ՄԽԻԹԱՐԵԱՆԻ ԱՌԱՋԻՆ ԶԱՒԱԿԸ
Անցեալ շաբթուան ընթացքին ծնաւ Հայաստանի հաւաքականի եւ Իտալիոյ Ռոմա ակումբի խաղացող Հենրիկ Մխիթարեանի առաջին զաւակը: Սոյն լուրը առաջին անգամ յայտարարեց իտալական ակումբը՝ թուիթըրի իր էջով. «Ծնաւ Հենրիկ Մխիթարեանի որդին՝ Համլեթը», գրուած էր ակումբի հրապարակած լրատուութեան մէջ: Նոյն օրը նաեւ Հայաստանի Հանրապետութեան նախագահ Արմէն Սարգսեան շնորհաւորեց հաւաքականի խաղացողը առջինեկ մանչի ծնունդին առիթով: Նախագահ Սարգիսեան Ինսթակրամի իր էջին վրայ Մխիթարեանին հետ լուսանկար մը հրապարակելով գրեց՝ «Աչքդ լոյս, սիրելի՛ Հենրիկ։ Բարի գալուստ նոր աշխարհ, կրտսեր Համլե՛թ Մխիթարեան, մեծ ֆութպոլը քեզի կը սպասէ»:
ՄԻՋԱԶԳԱՅԻՆ
ԶԻՏԱՆ ՊԱՀԱՆՋՈՒԱԾ Է ԻՒՎԵՆԹՈՒՍԻ ԿՈՂՄԷ
Ըստ իտալական Daily Mail-ին, Թուրինի Իւվենթուսի ղեկավարութիւնը ընթացիկ մրցաշրջանի աւարտին ամէն գնով կը փորձէ պայմանագրութիւն կնքել Ռէալ Մատրիտի գլխաւոր մարզիչ Զինետին Զիտանի հետ: Իւվենթուս, որ դժգոհ է խումբի գլխաւոր մարզիչ Մաուրիցիօ Սարիի աշխատանքէն, Զիտանին կ’առաջարկէ 3 տարուան պայմանագրութիւն՝ տարեկան 8 միլիոն եւրօ աշխատավարձքով: Աղբիւրը կը յայտնէ, որ ֆրանսացի մասնագէտը պատրաստ է ընդունելու իտալական ակումբին առաջարկը, որովհետեւ անոր եւ Ռէալ Մատրիտի նախագահ Ֆլորենթինօ Փերէզին միջեւ յարաբերութիւնը լաւ ընթացքի մէջ չէ: Յիշենք, որ Զիտանին սպանական ակումբին հետ պայմանագրութիւնը կ’աւարտի 2022-ին:
Ըստ տարածուած տեղեկութիւններուն, Ռէալի վարչակազմը արդէն սկսած է աշխատանք տանիլ գտնելու Զիտանին փոխարինողը: Ան բանակցութիւններ սկսած է վարել Թոթենհամի նախկին մարզիչ Մաուրիցիօ Փոչետինոյի հետ:
ԷՏԷՆ ՀԱԶԱՐ ԿԸ ԴԱՐՄԱՆՈՒԻ ԱՄԵՐԻԿԱՅԻ ՄԷՋ
Սպանիոյ մայրաքաղաք Ռէալ Մատրիտի արքայական ակումբին մամլոյ քարտուղարութիւնը յայտնեց, որ խումբի պելճիքացի յարձակողական խաղացող Էտէն Հազար տասը օրուան համար մեկնեցաւ Ամերիկայի Միացեալ Նահանգներ՝ ենթարկուելու համար վիրաբուժութեան: Հազարին հետ մեկնեցան նաեւ Ռէալի ակումբի բժշկական կազմին ներկայացուցիչները, որոնք պիտի հսկեն անոր դարմանումին: Սպանիա վերադառնալէ ետք պիտի սկսի անոր ապաքինումը: Աւելցնենք, որ սպանական ակումբը հսկայ գումար յատկացուցած էր պելճիքացի խաղացողը խումբին միացնելու համար, բայց ան երկար ժամանակաշրջան մնաց դաշտերէն հեռու, վիրաւորուած ըլլալուն պատճառով, եւ խումբին հետ մաս կազմեց միայն տասը մրցումներու:
ՌՈՆԱԼՏՕ ԿԱՏԱՐԵՑ ԻՐ 1000-ՐԴ ՄՐՑՈՒՄԸ
Իտալիոյ Իւվենթուսի յարձակողական խաղացող Քրիստիանօ Ռոնալտօ Կիրակի երեկոյեան կատարեց իր մարզական կեանքին 1000-րդ մրցումը: Ան խաղցաւ Իտալիոյ ախոյեանութեան 26-րդ փուլի Ինթըր Միլանի կազմին դէմ տեղի ունեցած մրցումին: Մարզական կեանքի ընթացքին ան նշանակած է 725 կոլ, որոնցմէ 99 կոլը եղած է Փորթուկալի հաւաքականին հետ կատարած 164 մրցումներուն ընթացքին: Ակումբային մակարդակով, 35 տարեկան մարզիկը հանդէս եկած է Սփորթինկի (31 խաղ, 5 կոլ), Մանչեսթըր Իւնայթըտի (292 խաղ, 118 կոլ), Ռէալ Մատրիտի (438 խաղ, 450 կոլ) եւ Իւվենթուսի հետ (75 խաղ, 53 կոլ):
Պատրաստեց
Ռաֆֆի Սիւլահեան
Ռաֆֆի Սիւլահեան