Սիրելի արցախցիներ,
նախընտրական քարոզարշաւը մօտենում է իր եզրագծին: Քարոզարշաւին հանրութեանն ենք ներկայացրել Դաշնակցութեան տեսակէտները իրավիճակի եւ առկայ խնդիրների վերաբերեալ:
Աւաղ, յայտնի պատճառներով չենք հասցրել այցելել բոլոր բնակավայրերը: Հայցում եմ մեր ընտրողների ներողամտութիւնը: Նրանց հետ կը հանդիպենք այլ առիթներով:

իմ հիմնական ասելիքը հակիրճ ամփոփելու համար յարկ եմ համարում ընդգծել, որ արցախեան նորօրեայ պայքարում բոլոր հիմնախնդիրները մենք յաղթահարել ենք միասնաբար` քայլ առ քայլ կերտելով մեր պետականութիւնը շարունակուող հակամարտութեան, քաղաքական բարդ գործընթացների եւ վտանգաւոր միտումների պայմաններում:
Այս հանգրուանում մեր առջեւ ծառացած մարտահրաւէրները յաղթահարելու եւ երկրի զարգացմանը նոր շունչ հաղորդելու առանցքային նախադրեալը համազգային ներուժի համախմբումն է եւ առաջնահերթութիւնների շուրջ քաղաքական համախոհութեան ձեւաւորումը, որին եւ հետամուտ ենք:
Մեր երկրում անհրաժեշտ են այնպիսի փոփոխութիւններ, որոնք մեզ կ’օգնեն բնականոն զարգանալ` ապահովելով կայունութիւն եւ առկայ բազմաբնոյթ խնդիրներին խելամիտ լուծումներ տալ` զերծ մնալով ցնցումներից:
Ժողովրդին յուզող հարցերին հանգամանօրէն անդրադարձել ենք ՀՅԴ նախընտրական ծրագրում, որն ունի ընդգծուած սոցիալական ուղղուածութիւն: Անելիքները շատ են անվտանգութեան եւ պաշտպանութեան, կրթութեան եւ գիտութեան, մշակոյթի, երիտասարդութեան եւ սպորտի, առողջապահութեան եւ բնապահպանութեան, պետական կառավարման համակարգի, տնտեսական, հարկաբիւջետային եւ վերաբնակեցման, արտաքին եւ ներքին յարաբերութիւնների, զբօսաշրջութեան եւ այլ ուղղութիւններում:
2017 թուականին, երբ ընդունւում էր նոր Սահմանադրութիւն, մենք դէմ ենք արտայայտուել կառավարման ներկայ համակարգին, եւ համոզուած ենք, որ մեր երկրում արդիւնաւէտ է խորհրդարանական կառավարման համակարգը: Սահմանադրական փոփոխութիւններով պէտք է ապահովուի օրէնսդիր, գործադիր եւ դատական իշխանութեան տարանջատումը, հակակշիռների եւ զսպումների կառուցակարգերի ներդրումը եւ հանրային վերահսկողութեան ընդլայնումը: Այսպիսի բարեփոխումները խթանիչ ազդակ կը դառնան պատասխանատուութեան բարձրացման, հասարակական առաջընթացի եւ պետականութեան ամրապնդման համար:
Տնտեսական զարգացման ընթացքն արագացնելու, ներդրումային իրավիճակը բարելաւելու եւ ներքին համերաշխութիւնն ամրացնելու գործում հանգուցային նշանակութիւն ունի ապօրինութիւնների, մենատիրութեան երեւոյթների, կոռուպցիայի եւ հովանաւորչութեան դէմ պայքարի արդիւնաւէտ մեխանիզմների որդեգրումը, ինչը կ’ընդլայնի նաեւ սոցիալական խնդիրների լուծման հնարաւորութիւնները;
Կարեւոր է վերահսկողական գործառոյթ իրականացնող պետական մարմիններում ընդդիմութեան ազդեցիկ դերակատարութեան ապահովումը:
Սիրելի՛ հայրենակիցներ,
Անհրաժեշտ եմ համարում ուշադրութիւն հրաւիրել հետեւեալ դիտարկումների եւ նկատառումների վրայ.
Համապետական այս ընտրութիւններին մասնակցում են աննախադէպ շատ թեկնածուներ եւ քաղաքական ուժեր, այդ թւում` նաեւ նոր ձեւաւորուած, նորայայտ կուսակցութիւններ: Շատ հարցերում մենք կարող ենք տարակարծիք լինել, սակայն ընտրապայքարը չպէտք է մթագնի կենսական հարցերում համերաշխութեան գիտակցութիւնը, եւ բոլորս պէտք է ջանանք, որպէսզի քարոզարշաւն աւարտուի օրինականութեան, միմեանց եւ ընտրողների հանդէպ յարգանքի, առողջ բանավէճի եւ մրցակցութեան պայմաններում:
Մեր հասարակութեան ստուար մասն ապրում է հանապազօրեայ հոգսերը մի կերպ հոգալու մաշող պայքարում, ինչը լուրջ խնդիրների, բացթողումների եւ անելիքների մասին է խօսում: Պատահական չէ, որ նախագահի թեկնածուները եւ կուսակցութիւնները յատկապէս սոցիալ-տնտեսական իրավիճակի կտրուկ բարելաւման խոստումներ են շռայլում, սակայն լոկ խոստումներով այդ հարցերը չեն լուծւում, իսկ երբեմն դրանք պարզապէս մնում են որպէս գայթակղութեան միջոց:
Մինչդեռ, համախոհութեան եւ ջանքերի համախմբման ճանապարհով հնարաւոր է իրական գործ կատարել` մեր երկրում աղքատութիւնը յաղթահարելու, ընդհանուր բարեկեցութիւնը բարձրացնելու, արդարութեան եւ միասնութեան հիմքերն ամրապնդելու եւ արդիւնքում` էական առաջընթաց ապահովելու ուղղութեամբ:
ՀՅԴ նախընտրական ծրագրում ներկայացրել ենք իրատես մօտեցումներ, որոնք ժողովրդի հաւանութեանն արժանանալու պարագայում պատրաստ ենք կեանքի կոչել` այդ գործընթացում ձեւաւորելով հնարաւոր լայն համախոհութիւն:
Յարգելի՛ հայրենակիցներ,
Արցախ աշխարհի ներկայի եւ ապագայի համար պատասխանատու ենք բոլորս` անկախ մեր քաղաքական համոզմունքներից, տեսակէտներից, սոցիալական վիճակից, զբաղմունքից եւ այլ հանգամանքներից:
Շատ կարեւոր է, որ ազատ ու անկաշկանդ կամարտայայտութեամբ իրացնենք օրինական իշխանութիւնների ձեւաւորման երաշխաւորի մեր իրաւունքներն ու պարտականութիւնները` վերահաստատելով մեր ինքնիշխան պետութիւնն ամրապնդելու եւ զարգացնելու համաժողովրդական կամքը, միաժամանակ ընտրելով նախագահ եւ որոշելով քաղաքական ուժերի պատասխանատուութեան չափաբաժինը առաջիկայ տարիների համար:
Ընտրութիւնը քոնն է, հայրենակից:

ԱՀ նախագահի թեկնածու
Դաւիթ Իշխանեան