Հայ Յեղափոխական Դաշնակցութեան Բիւրօն իր մտահոգութիւնն է յայտնում ` Արցախի հիմնահարցի խաղաղ կարգաւորման բանակցութիւնների այս փուլին մասին Ռուսիոյ Դաշնութեան արտաքին գործոց նախարարին այսօրուան արտայայտած մօտեցումներին կապակցաբար: ՀՅԴ Բիւրօն նաեւ իր մտահոգութիւնն է յայտնում, որ ՌԴ արտաքին գործոց նախարարի այդ յայտարարութիւնը կատարուել է Հայաստանի եւ Ատրպէյճանի Հանրապետութիւնների արտաքին գործոց նախարարների հեռավար հանդիպումից ընդամէնը ժամեր առաջ:

Ցանկացած կարգաւորման բանաձեւի մէջ առաջնայինը պէտք է լինի Արցախի Հանրապետութեան անկախութեան ճանաչումը: Իսկ կողմերի միջեւ ցանկացած համաձայնութիւն պէտք է լինի համարժէք եւ միաժամանակեայ:

Ուղղակի անհրաժեշտութիւն է յստակ հայեցակարգի վրայ հիմնուած աշխատանքների իրականացումը, այդ թւում Արցախի Հանրապետութեան հետ ՀՀ-ի ռազմաքաղաքական համագործակցութեան պայմանագրի ստորագրումը, եւ Արցախի Հանրապետութեան միջազգային ճանաչման ուղղութեամբ աշխոյժ քայլերի ձեռնարկումը:

Ակնկալում ու պահանջում ենք ՀՀ իշխանութիւններից բանակցային գործընթացում առաջնորդուել Արցախի ժողովրդի 1991-ի անկախութեան եւ հետագայ սահմանադրական հանրաքուէներով արդէն իսկ կայացած կամարտայայտութեամբ:

ՀՀ իշխանութիւնները պարտաւոր են պաշտօնապէս յայտարարել, որ սեղանին չկայ հակամարտութեան փուլային կարգաւորում ենթադրող փաստաթուղթ եւ որ Հայաստանը դա ստորագրելու արտաքին ճնշումների ենթակայ չէ:

Միաժամանակ, հարկ ենք համարում արձանագրել, որ արտաքին ճնշումներին դիմակայելու միակ միջոցը համազգային համերաշխութիւնն է, որն ստեղծելու գլխաւոր պատասխանատուն ՀՀ իշխանութիւններն են. Արցախի հիմնահարցում, բոլո՛րս, ազգովին պատասխանատուութիւն եւ անելիք ունենք:

ՀՅԴ ԲԻՒՐՕ
21 Ապրիլ 2020