«Ազատ Օր».-Ուրբաթ՝ 24 Ապրիլ 2020ին, յունահայութիւնը առցանց կատարեց Հայոց Ցեղասպանութեան 105ամեակի նշումը։ Այս անգամ, Պսակաձեւ ժահրի համաճարակին պատճառով կիրարկուած արգիլումներու լոյսին տակ, Հ.Յ.Դ. Յունաստանի Հայ Դատի յանձնախումբը իր ծրագրուած հրապարակային ելոյթները փոխարինեց համացանցի վրայ սփռուած յատուկ յայտագիրով, որ ներկայացուեցաւ 24 Ապրիլի երեկոյեան՝ Հայ Դատի յանձնախումբի եւ «Ազատ Օր»ի էջերէն ու հասանելի դարձաւ ոչ միայն յունահայութեան, այլեւ աշխարհի բոլոր մասերուն մէջ ապրող հայերուն։
Արդէն, ամիսներ առաջ, ծանօթ դարձած էր, որ Յունաստանի հանրապետութեան նախկին նախագահ Փրոքոփիս Փաւլոփուլոս, որու պաշտօնավարութեան շրջանը աւարտեցաւ հազիւ Մարտին, պիտի ըլլար ապրիլեան կեդրոնական քաղաքական ելոյթի գլխաւոր հիւրը եւ բանախօսը։ Հայասէր նախագահը, որ իր քաղաքական գործունէութեան ընթացքին երբեք չզլացաւ իր անկեղծ հայասիրական զգացումները եւ գործնական զօրակցութիւնը յայտնել հայութեան, առաւել՝ անցեալ Նոյեմբերին պաշտօնապէս այցելած էր Հայաստան, այս անգամ եւս չմերժեց իր խօսքով մասնակցութիւն բերել առցանց ելոյթին, որ մեծապէս գնահատուեցաւ, ինչպէս նաեւ իր խորիմաստ խօսքը եւ քաղաքական կեցուածքը յատուկ տպաւորութիւն թողուց։
Առաւել, առցանց ելոյթին նշանակալից եղաւ յունական քաղաքական բարձր ներկայութիւնը, որ յատկանշուեցաւ Յունաստանի արտաքին գործոց նախարար Նիքոս Տենտիասի, հելլէն խորհրդարանի փոխնախագահ Նիքիթաս Քաքլամանիսի, Ատիկէի մարզպետ Եորղոս Փաթուլիսի, Մակեդոնիոյ մարզպետ Ափոսթոլոս Ծիծիքոսթասի եւ Թրակիոյ փոխ մարզպետ Քոսթաս Անտոնիատիսի ողջոյնի խօսքերով։
Հայաստանի Հանրապետութեան Յունաստանի մէջ արտակարգ եւ լիազօր դեսպան Ֆադէյ Չարչօղլեան հանդէս եկաւ ողջոյնի կուռ խօսքով։