Սիրելի հայրենակիցնե՛ր,

8_9 Մայիս1992_ը հայկական մարտական ուժերի ռազմական եզակի գործողութեան արդիւնքում ազատագրուեց Շուշին՝ դառնալով Արցախեան ազատամարտի բեկումնային եւ անշրջելի հանգրուանը: Շուշին հայ ժողովրդի հաւաքական երազանքների, ազատագրական պայքարի եւ քաղաքական արժանապատուութեան պսակն էր, Հայոց անկախ պետականութեան կերտման ճանապարհին վաւերական արժէք:

Մեր յաղթանակն արդիւնքն էր հայ ժողովրդի հաւաքական նուիրումի, ռազմական տաղանդի եւ պայմանաւորուած էր պատմական արդարութիւնը վերականգնելու, հայ ժողովրդի քաղաքական իրաւունքներն իրացնելու աներեր կամքով:

Շուշիի յաղթանակով ծնուեց Արցախի Հանրապետութեան պաշտպանութեան բանակը, որը շարունակում է լինել ազատ եւ անկախ Արցախի անվտանգութեան երաշխաւորը:

Մեր ազատագրական պայքարի խորհրդանիշ Շուշին այսօր, աւելի քան երբեք, հաստատում է այն ճշմարտութիւնը, որ մեր վերջնական յաղթանակը կոփուում է միայն համազգային միասնականութեամբ, զարգացող եւ կայուն պետականութեամբ:

Արցախեան ազատամարտով, հազարաւոր հայորդիների արեամբ նուաճուած Արցախի Հանրապետութեան անկախութիւնն անշրջելի է: Այն Արցախի, առհասարակ, հայ ժողովրդի անվտանգութեան եւ զարգացման գրաւականն է ու երաշխաւորը: Արցախի ժողովուրդն իրացրել է իր քաղաքական կամքն ու ինքնորոշման իրաւունքը, որը ենթակա չէ ո՛չ սակարկումների, ո՛չ զիջումների: Սա՛ է հզոր, արդար եւ միացեալ Հայաստան կերտելու ՀՅԴ տեսլականը:

Հայրենիքի ազատագրութեան մարտերում զոհուած քաջորդիներ, մեր խոնարհումը ՁԵԶ:

Սիրելի՛ հայրենակիցներ,

Շնորհաւորում ենք Շուշիի ազատագրման 28-ամեակի եւ Արցախի Հանրապետութեան պաշտպանութեան բանակի կազմաւորման առթիւ:

ՀՅԴ Հայաստանի Գերագոյն մարմին
8 Մայիս 2020