ՀՅԴ Արցախի Կեդրոնական Կոմիտէն հետեւեալ հաղորդագրութիւնը հրապարակած է․
Սիրելի հայրենակիցներ,
Արցախում առաջին անգամ կայացած համաժամանակեայ խորհրդարանական եւ նախագահական ընտրութիւնների արդիւնքներով այժմ կազմաւորւում են երկրի գործադիր եւ օրէնսդիր նոր իշխանութիւնները:
9 Ապրիլ 2020-ի յայտարարութեամբ տեղեկացրել ենք ԱՀ Ազգային Ժողովի ընտրութիւնների կապակցութեամբ մեր գնահատականների եւ նախագահական ընտրութիւնների երկրորդ փուլում ՀՅԴ դիրքորոշման մասին:
Նկատի ունենալով համապետական ընտրութիւնների եւ ընտրուած նախագահի հետ բանակցութիւնների արդիւնքները` նպատակայարմար չենք գտնում մաս կազմել ձեւաւորուող կառավարութեանը:
7 Յուլիս 2019- ին եւ 30 Օգոստոսին ՀՅԴ հրապարակած քաղաքական միասնական օրակարգի առաջնահերթութիւնների եւ նախընտրական ծրագրի հիման վրայ յարաբերութիւններ ենք կառուցելու ինչպէս քաղաքական ուժերի, այնպէս էլ Արցախի Հանրապետութեան իշխանութիւնների հետ:
Յոյսով ենք, որ նոր իշխանութիւնները ջանք չեն խնայի յաջողութիւններ արձանագրելու ներքաղաքական խորհրդակցութիւնների ընթացքում առաւել կարեւորուած` պետականութեան ամրապնդման, անվտանգութեան ապահովման, Արցախի Հանրապետութեան միջազգային ճանաչման, Սահմանադրական բարեփոխումների, Հայաստանի Հանրապետութեան հետ ռազմաքաղաքական դաշինքի իրաւապայմանագրային ամրագրման, տնտեսական զարգացման, սոցիալական արդարութեան հաստատման, վերաբնակեցման եւ ժողովրդագրական իրավիճակի բարելաւման ուղղութիւններով:
ՀՅ Դաշնակցութիւնն իր համահայկական կառոյցով հաստատակամօրէն շարունակելու է ներդրում ունենալ հայրենիքի բարգաւաճման գործում: ՀՅ Դաշնակցութեան ելակետային ուղենիշը եղել եւ մնում է ազատութեան, արդարութեան, ազգային ու համամարդկային արժէքների ամրակայումը եւ ներազգային համերաշխութեան ապահովումը:
ՀՅԴ Արցախի Կեդրոնական կոմիտէ
25.05.2020