ՔՈՆԿՐԷՍԻ ԳՐԱԴԱՐԱՆԸ ԿԸ ՇԱՐՈՒՆԱԿԷ ՑԵՂԱՍՊԱՆՈՒԹԻՒՆԸ ՈՒՐԱՆԱԼ

0

«Ասպարէզ».-Պատասխանելով Ամերիկայի Հայ Դատի Յանձնախումբին կողմէ անցեալ Դեկտեմբերին յղուած նամակին, Միացեալ Նահանգներու Քոնկրէսի գրադարանը տեղեկացուց, թէ պիտի շարունակէ Հայոց Ցեղասպանութեան անդրադառնալ՝ իբրեւ «Հայկական ջարդեր», հակառակ այն իրողութեան, որ Քոնկրէսի երկու ճիւղերը՝ Ներկայացուցիչներու տունը եւ Ծերակոյտը, անցեալ տարի յստակօրէն ճանչցան Հայոց Ցեղասպանութիւնը՝ հաստատելով յաջորդաբար թիւ 296 եւ 150 բանաձեւերը։
Ամերիկայի Հայ Դատի Յանձնախումբի գործադիր վարիչ Արամ Համբարեան քննադատեց այս քայլը, որուն իբրեւ «արդարացում» Քոնկրէսի գրադարանը իր 19 Յունիս թուակիր նամակին մէջ գրած էր, թէ այս հարցին մէջ կը հետեւի Միացեալ Նահանգներու նախագահին եւ արտաքին գործոց նախարարութեան օրինակին, հակառակ անոր որ, ինչպէս կառոյցին անունը կը թելադրէ, գրադարանը Քոնկրէսին հովանիին տակ կը գտնուի եւ ըստ սահմանադրութեան, երկրին գործադիր եւ օրէնսդիր մարմինները համահաւասար գործակիցներ են։
Նամակին ամբողջութիւնը կարելի է կարդալ http://asbarez.com/194822 կայքէջին վրայ։

Share.

Leave A Reply