Հայ Յեղափոխական Դաշնակցութեան Հայաստանի Գերագոյն Մարմինը 22 Յունիսին հրապարակեց սահմանադրական փոփոխութիւններուն մասին հետեւեալ յայտարարութիւնը.
«Սահմանադրական փոփոխութիւնների արագընթաց եւ անպատասխանատու կերպով Ազգային ժողովում ներկայացումը, քննարկումն ու ընդունումը փաստում են, որ.
«1․ Օրուայ քաղաքական իշխանութիւնը հետեւողականօրէն արհամարհում է երկրի Մայր օրէնքն եւ, ելնելով անձնական ու քաղաքական շահախնդրութիւնից, իրականացնում է կամակատար դատարան ունենալու ցանկութիւնը,
«2․ Օգտուելով երկիրը համակած «Քորոնա» ժահրի յաղթահարման պատրուակով յայտարարուած արտակարգ դրութիւնից, քաղաքական իշխանութիւնը անթաքոյց կերպով կայացնում է Սահմանադրութեան իրար հաւասարակշռող երեք ճիւղերից մէկի՝ դատական համակարգի առանցքային դերակատարութիւն ունեցող Սահմանադրական դատարանը զաւթելու որոշում, ինչը առերեւոյթ առաձնապէս ծանր յանցագործութեան տարրեր է պարունակում:
«Ամօթալի եւ անթոյլատրելի հակասահմանադրական այս ընթացքը պէտք է կասեցնել: Սահմանադրութեան փոփոխութիւնների վերաբերեալ Ազգային ժողովի ընդունած հակասահմանադրական որոշումները անհրաժեշտ է քննարկման առարկայ դարձնել Սահմանադրական դատարանում: Այս առումով ողջունում ենք «Բարգաւաճ Հայաստան» խորհրդարանական խմբակցութեան դիրքորոշումն ու նախաձեռնութիւնը, յորդորում ենք «Լուսաւոր Հայաստան» խորհրդարանական խմբակցութեան միանալ այս նախաձեռնութեան:
Դիմում ենք հանրապետութեան նախագահին, որպէս պետութեան գլուխ, նշուած հակասահմանադրական գործընթացի վերաբերեալ արտայայտել յստակ դիքորոշում եւ ձեռնարկել անհրաժեշտ գործողութիւններ»։