Ձայնակցելով Մեծի Տանն Կիլիկիոյ Կաթողիկոս ՆՍՕՏՏ Արամ Ա. Վեհափառ Հայրապետի զօրակցական կոչին, Բերիոյ Հայոց Թեմի ժողովականութեան եւ ժողովուրդին անունով խստօրէն կը դատապարտենք անցնող օրերուն հայ-ատրպէյճանական սահմանին վրայ Տաւուշի մարզին ուղղութեամբ Ատրպէյճանին հրահրած մարտական գործողութիւնները, որոնք պատճառ դարձան մարդկային զոհերու:

Սրտի խոր կսկիծով մեր վշտակցութիւնն ու ցաւակցութիւնը կը յայտնենք նահատակ հերոսներու ընտանիքներուն:
Փառք ու պատիւ հայրենիքի պաշտպանութեան համար իրենց կեանքերը զոհաբերող սահմանի մեր զինուորներուն:

Այս առիթով, մեր ամբողջական զօրակցութիւնը կը յայտնենք Արցախին, հայկական պետականութեան եւ հայոց բանակին: Հայաստան-Արցախ-Սփիւռք միասնական գործակցութեամբ ձախողութեան կը մատնենք մեր հայրենիքին ապահովութիւնն ու խաղաղութիւնը խաթարելու Թուրքիոյ բոլոր փորձերը:

Աղօթք բարձրացնելով առ բարձեալն Աստուած կը մաղթենք, որ շուտով խաղաղութիւնը հաստատուի Արցախի Հանրապետութեան պետական սահմանին վրայ եւ Արցախի մեր բնակավայրերը վերագտնեն իրենց ապահովութիւնը:

Մնամք սիրոյ ջերմ ողջունիւ եւ օրհնութեամբ,

Հալէպ, 16 Յուլիս 2020

Աղօթարար
Մասիս Եպս. Զօպուեան
Առաջնորդ Բերիոյ Հայոց Թեմին