ՀԵՏԱԽՈՒԶԱԿԱՆ – ՆԵՐԹԱՓԱՆՑՄԱՆ ՓՈՐՁ ՄԸ ԵՒՍ` ՁԱԽՈՂԱԾ. ԱՏՐՊԷՅՃԱՆ ԿԸ ՌՄԲԱԿՈԾԷ ՔԱՂԱՔԱՑԻՆԵՐՈՒ ԲՆԱԿԱՐԱՆՆԵՐ ԵՒ ԿԱՌՈՅՑՆԵՐ

0

14 Յուլիսին ժամը 00:15-էն հաստատուած փխրուն զինադադարը երկար չտեւեց. արդարեւ, 15 Յուլիսին ատրպէյճանական կողմը կատարեց սահմանային կոպիտ խախտում մը` հետախուզական-ներթափանցման փորձով մը, իսկ աւելի ուշ ռմբակոծելով քաղաքացիներու բնակարաններ եւ կառոյցներ:
Հայաստանի պաշտպանութեան նախարարութեան մամլոյ բանբեր Շուշան Ստեփանեան տեղեկացուց, որ 15 Յուլիսի լուսցող գիշերը ժամը 3:40-ի շուրջ Հայաստանի զինեալ ուժերու սահմանապահները նկատած են թշնամիի շարժում: Անցնելով շրջանաձեւ պաշտպանութեան, հայկական ստորաբաժանումները կանխած են հակառակորդի հետախուզական-ներթափանցման փորձը:
Թէժ մարտէ ետք հակառակորդը, կորուստներ կրելով, ետ շպրտուած է: Այնուհետեւ ատրպէյճանական ստորաբաժանումները ժամը 5:20-ին սկսած են ռմբակոծել Այգեպար եւ Մովսէս գիւղերը: Հայաստանի զինեալ ուժերուն ստորաբաժանումները չէզոքացուցած են ատրպէյճանական ուժերու սադրանքները: «Հայկական ստորաբաժանումները խոցած են թշնամիի հրետանի, հրետանային եւ ականանետային մարտկոցներու կրակային դիրքեր, որոնցմէ կը հրետակոծուէին մեր բնակավայրերն ու դիրքերը», յայտնեց ան:
Օրուան ընթացքին թշնամին ունեցած է մարդկային ու նիւթական վնասներ, սակայն հայկական կողմին վնասները հիմնականին մէջ նիւթական եղած են, Ատրպէյճանի մարտական անօդաչու թռչող սարքի հարուածէն վիրաւորուած է Չինարի գիւղի 48-ամեայ բնակիչ մը` Արամայիս Յովակիմեան, որուն վիճակը կայուն է:
«Ատրպէյճան, նորէն խախտելով մարտական գործողութիւններուն եւ կրակի դադրեցման համաձայնութիւնը, կը կիրարկէ հարուածային անօդաչու թռչող սարքեր, այդ կարգին` նաեւ բնակավայրերու ուղղութեամբ: Կը զգուշացնենք, որ ատրպէյճանական զինուած ուժերու առաւօտեան դիակներու թիւը կրնայ խիստ աւելնալ», յայտնեց Շուշան Ստեփանեան:
Հայաստանի Պաշտպանութեան Նախարարութիւնը նաեւ հերքեց ատրպէյճանական կողմին 16 Յուլիսին տարածած Հայաստանի զինեալ ուժերուն պատկանող X-55 անօդաչու սարք խոցուած ըլլալու տեղեկատուութիւնը: Նշուեցաւ, որ այսպիսով թշնամին կը փորձէ մեղմացնել իր զինուորական համակարգերու եւ մարդկային կորուստները:
16 Յուլիսին Իջեւանի ճգնաժամային տեղեկատուական կեդրոնին մէջ տուած մամլոյ ասուլիսին ընթացքին Պաշտպանութեան Նախարարութեան Վազգէն Սարգսեանի անուան զինուորական համալսարանի հրամանատարական բաժինի պետ Արծրուն Յովհաննիսեան յայտնեց, որ երեկոյեան մարտերը արդէն հանդարտած են, Արցախի Հանրապետութեան եւ Հայաստանի Հանրապետութեան սահմանագօտիներուն ուղղութեամբ իրավիճակը կը մնայ հանգիստ: Ան աւելցուց, սակայն, որ դէպքերը կրնան շուտով փոխուիլ, այդ պատճառով ալ հայկական կողմը միշտ պատրաստ եւ զգօն վիճակի մէջ է:
Ան հաստատեց, որ Ատրպէյճան զգալի թիւով կորուստներ տուաւ. «Մենք փաստացի այս պահուն նկարներով ունինք տասը դիակի դուրսհանման ապացոյց», ըսաւ Յովհաննիսեան:
Ըստ անոր, անոնք եղած են յատուկ նշանակութեան ուժերը: Ատրպէյճանական լրատուամիջոցները եւս հաստատած էին, որ կը գործէ «Եաշմա» ջոկատը, որ, Յովհաննիսեանի համաձայն, յատուկ նշանակութեան ջոկատներէն մէկն է, որուն հիման վրայ կը պատրաստուին ընդհանրապէս Ատրպէյճանի յատուկ նշանակութեան զօրքերը: Այլ խօսքով` անիկա ընտրանի ստորաբաժանում է: Յովհաննիսեան շատ տրամաբանական նկատեց, որ ատրպէյճանական երրորդ բանակային զօրախումբի եւ սահմանապահ ծառայութեան զօրքերու` իրենց մարտական հարցը լուծել չկարենալէ ետք գործի լծուի ընտրանի ստորաբաժանում` նախագահի բարձրագոչ յայտարարութիւններէն ետք:
Աւելի ուշ Շուշան Ստեփանեան տեղադրեց լուսանկարներ եւ տեսանիւթ, ուր կ՛երեւին ատրպէյճանական զինեալ ուժերու զինուորներուն դիերը եւ ինչպէ՛ս թշնամին հայկական կողմին արտօնութեամբ զոհերը կը տեղափոխէ:
Արծրուն Յովհաննիսեան տեղեկացուց, որ Ատրպէյճանի զինուած ուժերու հարուածային անօդաչու սարքը հարուածած է մարդասիրական առաքելութիւն իրականացնող` Հայաստանի արտակարգ իրավիճակներու նախարարութեան ինքնաշարժը` առանց մարդկային զոհեր պատճառելու:
Ան նաեւ խօսեցաւ Տեղական Ինքնակառավարման Մարմիններու եւ զօրամասերու մօտ հաւաքուող նախկին ազատամարտիկներու, նախկին զինուորականներու, բժիշկներու մասին, որոնք իրենց պատրաստակամութիւնը կը յայտնեն մեկնելու մարտական դիրքեր` ծառայութիւն կատարելու: Ան շեշտեց, որ տակաւին նման անհրաժեշտութիւն չկայ:
Նոյն հաստատումը կատարեց նաեւ Պաշտպանութեան Նախարարութիւնը, որ իր խորին երախտագիտութիւնը յայտնեց քաղաքացիներուն` հայրենիքի սահմաններու պաշտպանութեան գործին աջակցելու պատրաստակամութեան համար` բայց եւ այնպէս դիտել տալով, որ «Մեր ժողովուրդի անկոտրում ու մշտապէս պայքարի պատրաստ հայրենասէրներու այդ կորիզի` երկրապահներու, ազատամարտիկներու եւ առանձին քաղաքացիներու կամաւորագրման անհրաժեշտութիւն այս պահուն չկայ»:
Տաւուշի մարզպետ Հայկ Չօպանեան խօսեցաւ ռմբակոծումին իբրեւ հետեւանք տուներուն հասած վնասին մասին` դիտել տալով, որ կայ գոյքի եւ շինութեան վնասի 51 պարագայ: Այգեպարի մէջ նաեւ մանկապարտէզ մը վնասուած է` աւելցնելով, որ վնասուած են նաեւ ենթակառոյցներ, երթեւեկի միջոցներ, ընտանի անասուններու յատուկ շինութիւններ եւ այլն:
Մարզպետը հաստատեց, որ վերականգնման աշխատանքները անմիջապէս պիտի սկսին, մինչ այդ ապահովուած է բնակիչներուն կեցութեան վայրը եւ ապրուստի խնդիրը:
Միւս կողմէ, Հայաստանի քննչական կոմիտէի տեղեկատուութեան եւ հասարակութեան հետ կապի բաժինէն յայտնեցին, որ Ատրպէյճանի զինեալ ուժերուն կողմէ զինադադարի դրութեան խախտման, Ժընեւի ուխտերու պահանջներուն եւ միջազգային մարդասիրական իրաւունքի կանոնները կոպտօրէն խախտելու, խաղաղ բնակչութեան ուղղութեամբ ծանր հրետանային համակարգով, ականանետերով եւ այլ զինատեսակներով կրակոցներ արձակելու փաստերով Հայաստանի քննչական կոմիտէին մէջ յարուցուած է 30 քրէական գործ:

Share.

Leave A Reply