Սթրազպուրկի Եւրոպական Խորհրդարանին մէջ, 14 Փետրուարին տեղի ունեցած է Արցախի Հանրապետութեան մարդու իրաւունքներու պաշտպան Ռուբէն Մելիքեանի եւ Եւրոպական Խորհրդարանի պատգամաւոր Ֆրանք Էնկելի մամլոյ ասուլիսը:

Ասուլիսին սկիզբը Ռուբէն Մելիքեան նշած է, որ Արցախի քաղաքացիներուն համար շատ կարեւոր է, որ Եւրոպայի գործընկերներուն համար լսելի ըլլայ իրենց ձայնը։

Արցախի մարդու իրաւունքներու պաշտպանը նշած է, որ Եւրոպական խորհրդարանին մէջ հանդիպումներ ունեցած է խորհրդարանականներու հետ ու ներկայացուցած  իր վերջին զեկոյցը, որ կ՝անդրադառնայ Ապրիլ 2016-ին Ատրպէյճանի իրականացուցած վայրագութիւններուն:

«Ես յատկապէս ընդգծեցի մարդու իրաւունքներու կանոնաւոր խախտումները ապրիլեան պատերազմին ընթացքին, որուն վկայութիւնն է այն, որ Ատրպէյճանի հսկողութեան տակ յայտնուած Լեռնային Ղարաբաղի բնակչութեան 90 տոկոսը  խոշտանգուած կամ սպանուած է: Այս ամէնը տեղի ունեցած է Ատրպէյճանի իրականացուցած յարձակման ընթացքին», ըսած է Մելիքեան:

Ան աւելցնելով ըսած է, որ Եւրոպական Խորհրդարանին մէջ ներկայացուցած է իր զեկոյցին ոչ միայն հրապարակային տարբերակը, այլ նաեւ սահմանափակ հասանելիութիւն ունեցող տարբերակը, որուն մէջ մանրամասնօրէն անդրադարձ եղած է իւրաքանչիւր զոհի: Ան նշած է, որ ասիկա շատ տագնապալի իրավիճակ է մարդու իրաւունքներու համայնքին ու ամբողջ Եւրոպային համար` ընդգծելով, որ Եւրոպան, մարդու իրաւունքներու պաշտպանութեամբ զբաղող կառոյցները պէտք է անմիջական ներգրաւուածութիւն ունենան եւ ուսումնասիրեն, թէ ի՛նչ կը կատարուի Լեռնային Ղարաբաղի մէջ.

«Ասիկա շատ վտանգաւոր է, քանի որ Ատրպէյճանը կը մտածէ, որ կրնայ իր ուզածը իրականացնել ու այդ ամէնը հնարաւոր չ՝ըլլար անկախ ձեւով հաստատել»:

ՄԻ պաշտպանը Եւրոպական խորհրդարանի անդամներուն հետ քննարկած է նաեւ օրերս Պիելառուսէն Ատրպէյճան արտայանձնուած Ալեքսանտր Լափշինի հարցը, որ, ինչպէս ըսած է Մելիքեան. «Ազատ խօսքը լռեցնելու ու դէպի Արցախ այցը վտանգաւոր դարձնելու փորձ էր: Ասիկա եւս մարդու իրաւունքներու շատ վտանգաւոր հարց է, ասիկա ոչ միայն Լափշինի հարցն է, այլ նաեւ այն բոլոր մարդոց, որոնք այցելած են կամ պիտի այցելեն Արցախ: Լեռնային Ղարաբաղի քաղաքացիները բազմիցս ապացուցած են, որ պատրաստ են ըլլալու առաւել ներգրաւուած Եւրոպայի մէջ, ստանձնելու Եւրոպական արժէքները եւ անոնք արժանի են ունենալու այդ հնարաւորութիւնը»:

Share.

Leave A Reply