Չորեքշաբթի, 15 Մարտ 2017-ի երեկոյեան ժամը 4:00-ին, Գամիշլիի «Կիւլպէնկեան» սրահէն ներս տեղի ունեցաւ ՍՕԽ-ի «Արցախ» Մասնաճիւղի Վարչութեան եւ յանձնախումբերուն կազմակերպած Մայրերու օրուան նուիրուած ձեռնարկը:

Տօնակատարութեան բացման հայերէն եւ արաբերէն խօսքերով յաջորդաբար հանդէս եկան վարչութեան ատենապետուհի Ռուզան Պետրոսեան-Ղազարեան եւ Թալին Փափազեան-Օհանեան, որոնք ներկաներուն բարի գալուստ մաղթելէ ետք անդրադարձան մօր վսեմ առաքելութեան, նամանաւանդ հայ մօր Սփիւռքի ջլատող պայմաններուն մէջ կրկնակի առաքելութեան՝ մարդակերտման եւ հայեցի դաստիարակութեան: Անոնք ողջունեցին նահատակներու մայրերը, որոնք իրենց ամենաթանկը զոհաբերեցին յանուն ազգի եւ հայրենիքի, որմէ ետք ՍՕԽ-ի Շրջանային Վարչութեան անդամն Լուսին Յովհաննէսեան ընթերցեց ՀՕՄ-ի Կ.Վարչութեան մամլոյ հաղորդագրութիւնը՝ այս առիթով փոխանցելով ՀՕՄ-ի Կ.Վարչոութեան բարեմաղթութիւնները Սփիւռքի եւ հայրենի ոստաններու իր աշխարհասփիւռ միաւորներուն, ապա լուսարձակի տակ առաւ Կանանց միջազգային օրուան պատմականը՝ նշելով որ ՀՕՄ-ը մաս կը կազմէ ՄԱԿ-ի այն յանձնաժողովին, որ կը հետեւի կիներու մարդկային եւ այլ իրաւունքներու պաշտպանութեան:
Ապա Մեղրի Ասիլեան եւ Ալին Հապոյեան տպաւորիչ առոգանութեամբ ասմունքեցին Յովհաննէս Շիրազի մօր նուիրուած քերթուածներէն համադրում մը՝ խորապէս ներշնչելով ներկաները:
Տէր Պսակ Քահանայ Պէրպէրեան իր հայրական խօսքով բարձրօրէն գնահատեց ձեռնարկի կազմակերպիչ յանձնախումբը՝ մաղթելով բեղուն գործունէութիւն ապա շնորհաւորեց բոլոր մայրերը, նշելով որ անոնք զոհաբերութեան մարմնացումն են մեր կեանքին մէջ:
Աւարտին տեղի ունեցաւ Յանձնախումբին կողմէ պատրաստուած կոկիկ հիւրասիրութիւն: Երեկոն շարունակուեցաւ ջերմ մթնոլորտի մէջ:

Բժշկհ. Մարի Մելքոն

 
Share.

Leave A Reply