Նախընտրական քարոզարշաւի շրջագիծին մէջ Դաշնակցութեան ներկայացուցիչները երէկ  հանդիպում ունեցան Կոտայքի մարզի Հրազդան, Չարենցաւան քաղաքներու եւ Քաղսի գիւղի ընտրողներու հետ:

«Եթէ Ազգային ժողովի ընտրութիւններուն ժամանակ չկարենանք ճիշդ Ազգային ժողով ձեւաւորել, ո՛չ որակեալ իշխանութիւն կ՛ունենանք, ո՛չ ալ որակեալ կառավարում», Քաղսի համայնքի ընտրողներուն հետ հանդիպումին յայտարարեց ՀՅԴ Հայաստանի Գերագոյն մարմինի անդամ Արսէն Համբարձումեան:

«Երբ արտը կ՛ուզէք ցանել, նախ եւ առաջ կը նայիք, եթէ սերմացուն որակեալ եւ ախտահանուած է. եթէ դուք վատ սերմացու ցանէք` հաստատ լաւ արդիւնք չէք ունենար: Այս ընտրութիւններուն մենք բոլորս պիտի երթանք այդ սերմը ցանենք, եւ եթէ այդ սերմին մէջ որոմը եւ կեղտը շատ է` անկէ լաւ բերք չենք կրնար ստանալ: Միայն լաւ խօսքերով չէ, պէտք է նայիք այդ մարդոց անցած ճամբան: Այն բծախնդրութեամբ, որով ձեր արտը կը ցանէք` նոյնքան բծախնդրութեամբ նայեցէք այս ընտրութիւններուն: Ընտրեցէ՛ք այն սերմը, որ վաղը արդիւնք պիտի տայ», ըսաւ ան:

Արսէն Համբարձումեանի համաձայն, մեր երկրին մէջ մեծագոյն խնդիրը ոչ արդիւնաւէտ կառավարումն է:

«Եթէ մենք մեր երկրին մէջ արդիւնաւէտ կառավարում չունենանք` հարցերը պիտի լուծուին, իսկ արդիւնաւէտ կառավարում կրնանք ունենալ, եթէ Ազգային ժողովին մէջ ունենանք ճիշդ մարդիկ: Եթէ մենք չունենանք լաւ Ազգային ժողով, հոն չըլլան ճիշդ պատգամաւորներ, երկրի պետականաշինութեան գործը պիտի ձախողի եւ պիտի մնանք նոյն` կոտրած տաշտակին առջեւ», ըսաւ Համբարձումեան:

Share.

Leave A Reply