ՓԱՐԻԶ.- Կիրակի, 26 Մարտին, Փարիզի հռչակաւոր «Զենիչ» հսկայ համերգասրահին մէջ տեղի ունեցաւ «Եւրոպայի երաժշտութեան հայկական մրցանակներ»ու հանդէսը:

Հայաստանէն, Ֆրանսայէն եւ աշխարհի այլ անկիւններէ մասնակցելու հրաւիրուած էին հռչակաւոր աւելի քան 30 երգիչ-երգչուհիներ, բայց նաեւ նուագողներ, պարողներ, պարային համոյթներ:

Հոն էին Հայաստանը «Եւրոտեսիլ»ին ներկայացուցած Իվեթա Մուկուչեան եւ Արամ «Էմ.Փի. 3», նաեւ Յարութ Փամպուքճեան, Թաթա Սիմոնեան, Սիրուշօ, ֆրանսահայ ծանօթ երգչուհի Ռոզի Արմէն, նոր սերունդէն Րաֆֆի Արթօ, որ ծանօթ անուն դարձած է ֆրանսական հեռատեսիլի երգի մրցումներէն, եւ դեռ ֆլամենքոյի ծանօթ պարուհի Լոռի Լա Արմէնիա, որուն ընկերակցող երաժիշտներուն ելոյթը ինքնին վայելք մըն էր, դուդուկի աշխարհահռչակ վարպետ Ճիւան Գասպարեան, որ անակնկալի բերաւ բոլորը՝ իր գեղեցիկ ձայնով ու երգեցողութեամբ ցոյց տալով, որ զինք հռչակաւոր դարձուցած նուագարանին վարպետը չէ միայն… եւ բազմաթիւ ուրիշներ: Անոնք, իրարու ետեւէ շուրջ չորս ժամ տողանցեցին բեմին վրայ՝ խանդավառելով շուրջ 3000 հանդիսականները, որոնք բացի Ֆրանսայի չորս անկիւններէն, եկեր էին Մեծն Բրիտանիայէն, Հոլանտայէն, Գերմանիայէն, Պելքիճայէն…։ Ներկաներուն մէջ էին տարբեր բնագաւառներու հայ հանրածանօթ անուններ, ինչպէս օրինակ՝ կռմփամարտի ախոյեան Արթուր Աբրահամ եւ ուրիշներ:

Նման հսկայական ծրագրի մը նախաձեռնելու քաջութիւնը ունեցեր էին երկու երիտասարդներ՝ Հայկ Շահպազեան եւ Աննա Գարոլինա, որոնք անմիջական նեցուկը վայելած էին Փարիզի Համազգայինին: Ձեռնարկի տեղեկատուական հովանաւորութիւնը ստանձնած էր Հայաստանի Ազգային հեռատեսիլը:

Որքան որ ալ կարեւորագոյնը մրցանակներու բաշխումը չէր եւ ատիկա կը մնար առաւելաբար խորհրդանշական, այդուամենայնիւ յիշենք կարեւորագոյն մրցանակները ստացածներու անունները: Մրցանակաբաշխութեան ընտրութիւնը կատարուած է արուեստագէտներու այս տարուան ընթացքին կատարած աշխատանքներուն հիման վրայ.

Տարուան լաւագոյն ֆրանսահայ արուեստագէտը՝ Ռոզի Արմէն

Տարուան լաւագոյն երգիչը՝ Էրիկ

Տարուան լաւագոյն երգչուհին՝ Սիրուշօ

Տարուան լաւագոյն փոփ-ռոք երգչուհին՝ Սոնա

Ֆիլմի լաւագոյն երաժշտութեան մրցանակը՝ Արթուր Գրիգորեանին եւ Աւետ Բարսեղեանին («Կեանք Ու Կռիւ» ժապաւէն)

Տարուան լաւագոյն երաժշտական նախագիծի մրցանակը՝ Հ1 հեռատեսիլի «Բենեֆիս» յայտագիրին. մրցանակը յանձնուեցաւ անոր արտադրիչ Արթուր Մանուկեանին:

«Դարուս առասպելական երգիչը» յատուկ մրցանակն ալ շնորհուեցաւ Շարլ Ազնաւուրին, իր բացակայութեան:

Ինչ ալ ըլլան գնահատականները, մէկ բան յստակ է՝ կազմակերպիչները հասած են իրենց նպատակին, որն էր՝ հիմը դնել արհեստագիտական նորարարութիւններով օժտուած հայ մշակութային հսկայական ձեռնարկի մը աւանդութեան, ապա մանաւանդ՝ ամուր կամուրջ ստեղծել հայ-եւրոպական մշակոյթներու միջեւ՝ այդպիսով քով-քովի բերելով նաեւ բոլոր հորիզոններէ հայեր: Մրցանակի արձանիկն ալ արդէն կը խորհրդանշէ հայ-եւրոպական մշակոյթներու օղակումը, անոր մէկ երեսին քանդակուած ըլլալով Հայաստանի քարտէսը, իսկ միւս երեսին՝ եւրոպականը:

Share.

Leave A Reply