Զինեալ խմբաւորումներու կողմէ տարիներէ ի վեր շրջափակուած Իտլիպ նահանգի Ֆուաա եւ Քաֆրիա աւաններէն, սուրիական բանակին եւ զինեալներուն միջեւ գոյացած համաձայնութեան հիման վրայ, Շաբաթ, 15 Ապրիլ 2017-ին հանրակառքերով դուրս եկած թիւով 5000 բնակիչները Հալէպի Ռաշիտին թաղամաս հասնելէ ետք, ահաբեկչական գործողութեան մը թիրախ դարձան, երբ ականապատուած ինքնաշարժ մը պայթեցաւ հանրակառքերուն մօտ:

Պայթիւնին հետեւանքով զոհուեցաւ աւելի քան հարիւր քաղաքացի, մեծամասնութեամբ կիներ եւ երեխաներ, վիրաւորուեցաւ 200 քաղաքացի: Արձանագրուեցաւ նիւթական մեծ վնասներ, հրկիզուեցան տասնեակ հանրակառքեր եւ շտապ օգնութեան մեքենաներ:

Նշենք, որ երէկ յետմիջօրէին Հալէպի Ռաշիտին շրջան հասած էր 75 պետական հանրակառք եւ 20 շտապ օգնութեան մեքենայ, որոնք Քաֆրիա ե Ֆուաա աւաններէն 5000 բնակիչներ փոխադրած էին Հալէպի Ռաշիտին թաղամաս:

Այսօր, Հալէպի հայ համայնքապետները չեղեալ համարեցին Ս. Զատկուան տօնին առիթով Ս. եւ Անմահ պատարագէն վերջ տեղի ունենալիք պաշտօնական շնորհաւորանքները՝ յարգելու համար Քաֆրիայի եւ Ֆուաայի անմեղ զոհերուն յիշատակը:

Share.

Leave A Reply