«Թերթ» կայքը կը հաղորդէ, որ Թուրքիոյ մեծագոյն քաղաքին` Պոլսոյ հայաշատ թաղամասերու բնակչութեան մեծամասնութիւնը «Ոչ» քուէարկած է Թուրքիոյ նախագահի լիազօրութիւնները ընդարձակելու նպատակով կազմակերպուած հանրաքուէին:

Հայաշատ Պեշիքթաշի, Գատըգիւղի (Գատըքէօ), Շիշլիի եւ Պաքըրգիւղի (Պաքըրքէօյ) թաղամասերուն մէջ «Ոչ»-ի քուէն ընդհանրապէս 70-80 առ հարիւր եղած է:

Պոլսոյ կղզիներուն մէջ, ուր կը գերակշռէ հայ, յոյն եւ հրեայ բնակչութիւնը, կառավարման նախագահական համակարգին դէմ քուէարկած է բնակիչներուն մօտաւորապէս 74 առ հարիւրը:

Թուրքիոյ նախագահ Ռեճէպ Թայիպ Էրտողանի կողմէ յառաջ մղուող հանրաքուէն պարտութիւն կրած է Պոլսոյ մէջ, հակառակ անոր որ Էրտողան նախապէս եղած է Պոլսոյ քաղաքապետը:

Էրտողանի դէմ հանդէս եկած է նաեւ քրտաբնակ շրջաններուն մեծ մասը: «Ոչ» քուէները ջախջախիչ մեծամասնութեամբ յաղթած են յատկապէս Տերսիմի, Շըրնաքի, Տիգրանակերտի եւ Կորճայքի մէջ:

Երկրի այլ մեծ քաղաքներուն մէջ եւս (Անգարա, Իզմիր, Անթալիա եւ այլն) մեծամասնութիւնը նախագահական դրութեան անցնելու գաղափարին դէմ քուէարկած է:

Սակայն, սահմանադրական փոփոխութիւններուն ի նպաստ քուէարկած են գլխաւորաբար երկրին կեդրոնական նահանգները, որոնց բնակիչներուն մեծ մասը ազգայնամոլ կամ կրօնամոլ հայեացքներով ծանօթ է:

Share.

Leave A Reply