Երկուշաբթի, 10 Յուլիսին, Ատրպէյճանի Պաշտպանութեան Նախարարութիւնը հրապարակած է տեսանիւթ եւ հաղորդագրութիւն մը, ուր կը նշուի, թէ Ռուսիայէն ստացած է զինուորական սարքերու եւ զինամթերքի հերթական առաքում:

ԱՓԱ լրատու գործակալութիւնը` վկայակոչելով երկիրի պաշտպանութեան նախարարութեան կայքը կը յայտնէ, որ Ռուսիայէն ժամանակակից սպառազինութեան հերթական քանակը մատակարարուած է Ատրպէյճանին` ըստ երկու երկիրներուն միջեւ սպառազինական համագործակցութեան վերաբերող համաձայնութեան:

Ինչպէս կը գրէ գործակալութիւնը, կը շարունակուի դէպի Ատրպէյճան ռուսական արտադրութեան ժամանակակից սպառազինութեան, ռազմամթերքի եւ այլ սարքերու մատակարարման հոլովոյթը:

Պաքուի նաւահանգիստ հասած են մեծ քանակութեամբ արկեր, հրթիռներ եւ այլ ռազմական սարքաւորումներ` նախատեսուած համապատասխան հրթիռահրետանային համակարգերով ռազմական միջոցներու, սակրաւորական կառոյցներու, կենդանի ուժի եւ այլ թիրախներու ճշգրիտ ու տարածական հարուածման համար:

Յիշեցնենք, որ 24 Յունիսին հաղորդուած էր, որ Ռուսիայէն նոր սպառազինութիւն մատակարարուած է Ատրպէյճանին` միջկառավարական համաձայնագիրի եւ Ատրպէյճանի ու Ռուսիոյ միջեւ սպառազինական համագործակցութեան ծիրին մէջ:

Share.

Leave A Reply