Համաշխարհային նաւթային 22-րդ համագումարին մասնակցելու նպատակով Պոլիս գտնուող Միացեալ Նահանգներու արտաքին գործոց նախարար Ռեքս Թիլըրսըն հանդիպումներ ունեցած է Թուրքիոյ եւ Ատրպէյճանի նախագահներուն հետ:

«Արմէնփրէս»ի հաղորդմամբ, Թուրքիոյ նախագահի պաշտօնական կայքը կը հաղորդէ, որ Թուրքիոյ նախագահ Ռեճէպ Թայիպ Էրտողան Պոլսոյ «Թարապիա» պալատին մէջ ընդունած է Միացեալ Նահանգներու արտաքին գործոց նախարար Ռեքս Թիլըրսընը:

Նախապէս Թիլըրսըն Պոլսոյ մէջ հանդիպում ունեցած էր Թուրքիոյ արտաքին գործոց նախարար Մեւլութ Չաւուշօղլուի հետ: Կողմերը քննարկած էին քաթարեան տագնապին վերջին զարգացումները, ինչպէս նաեւ ահաբեկչութեան դէմ պայքարի հարցը:

Աւելի ուշ, «Ռոյթըրզ» լրատու գործակալութիւնը հաղորդեց, որ ամերիկեան դիւանագիտութեան պետը Միացեալ Նահանգներու դեսպանատան անձնակազմին հետ ժողովի ընթացքին յոյս յայտնեց, որ Միացեալ Նահանգներու եւ Թուրքիոյ միջեւ լարուած յարաբերութիւնները, Էրտողանի հետ շարք մը ժողովներէն ետք, բարելաւման ընթացքին մէջ կը գտնուին:

Ան ըսաւ, որ հիւսիսային Սուրիոյ մէջ խաղաղութեան հաստատման համար կ՛ուզէ Միացեալ Նահանգներու եւ Թուրքիոյ միջեւ գործընկերութեան ամրապնդում տեսնել:

Միւս կողմէ ԱՓԱ` վկայակոչելով Ատրպէյճանի նախագահի մամլոյ ծառայութիւնը կը հաղորդէ, որ Պոլսոյ մէջ տեղի ունեցած Ատրպէյճանի նախագահ Իլհամ Ալիեւի եւ Միացեալ Նահանգներու արտաքին գործոց նախարար Ռեքս Թիլըրսընի հանդիպումին ընթացքին քննարկուած են Լեռնային Ղարաբաղի տագնապի լուծման առնչուող հարցեր:

Ալիեւ անգամ մը եւս յայտնած է Ատրպէյճանի դիրքորոշումը` տագնապի լուծման առնչութեամբ, ինչպէս նաեւ ներկայացուցած վերջին օրերուն շփման գիծին մէջ տեղի ունեցած դէպքերու ի՛ր տարբերակը:

Ինչպէս կը հաղորդուի, հանդիպումին ընթացքին ընդգծուած է, որ երկկողմանի յարաբերութիւնները լաւապէս կը զարգանան տարբեր ոլորտներու մէջ, ներառեալ` քաղաքական եւ ուժանիւթի:

Քննարկումներ տեղի ունեցած են «Հարաւային կազային միջանցք» նախագիծին վերաբերեալ: Միացեալ Նահանգներու արտաքին գործոց նախարարը նշած է, որ Միացեալ Նահանգներ պիտի շարունակեն աջակցիլ այդ նախագիծին:

Share.

Leave A Reply