Հայ Դատի Եւրոպայի յանձնախումբի գրասենեակի նախագահ Գասպար Կարապետեանը «Արմէնփրէս»-ի հետ զրոյցի մը ընթացքին յայտնեց, որ Եւրոպայի Հայ Դատի գրասենեակը պիտի շարունակէ տեղեկացնել Եւրոպական խորհրդարանի եւ Եւրոպական երկիրներու  խորհրդարաններու պատգամաւորները սահմանին վրայ Ատրպէյճանի կողմէ յարձակումներուն եւ զինադադարի խախտումներուն մասին:

Անոր համաձայն, պէտք չէ բացառել 2016-ի ապրիլեան վայրագ յարձակումներու նման նոր գործողութիւններու  հաւանականութիւնը, սակայն պէտք է ամէն ինչ ընել, որ անոնք  չկրկնուին:

Դիտարկման, թէ Հայ Դատի գրասենեակը, ինչպէս նախորդ, այնպէս ալ այս տարի շարունակած է Եւրոպայէն պատգամաւորներու, հասարակական խումբերու այցելութիւններ կազմակերպել դէպի Արցախ, արդեօ՞ք նման այցելութիւնները պիտի շարունակուին, Գասպար Կարապետեան ըսած է. «Այո՛, այս այցելութիւնները պիտի շարունակուին, որովհետեւ Արցախը մեր ներկայ գործունէութեան ամէնէն կարեւոր առաքելութիւններէն մէկն է: Տակաւին քանի մը օր առաջ կազմակերպեցինք Պելճիքայի  պատգամաւորներու այցելութիւնը դէպի Հայաստան եւ Արցախ: Անոնք տեսակցութիւններ ունեցան պետական բարձրագոյն ներկայացուցիչներու հետ: Այս այցելութիւնը 2017-ին արդէն 3-րդն էր: Վերջին երկու տարիներուն միայն Պելճիքայէն 22 պատգամաւորներ այցելեցին մեր զոյգ հանրապետութիւնները»:

Անդրադառնալով  այցելութիւններու արդիւնքներուն Գասպար Կարապետեան ըսած է. «Ինչպէս տեղեակ էք, Արցախի Հանրապետութեան աշխարհաքաղաքական իրավիճակը եւ թուրք-ատրպէյճանական շրջափակումը Արցախը կը պահէ մեկուսացման մէջ: Այս մեկուսացումը միայն քաղաքական չէ, այլեւ` տնտեսական եւ ընկերային: Ուստի եւրոպացի եւ օտար քաղաքական անձնաւորութիւններուն եւ լրագրողներուն առիթ պէտք է տրուի այցելելու Արցախ, ըլլալու ականատեսը տեղւոյն զարգացման յառաջընթացին, հանդիպելու պետական եւ կառավարական կառոյցներու ղեկավարներու հետ, ծանօթանալու ղարաբաղեան-ատրպէյճանական տագնապի վերջին տեղեկութիւններուն: Գրասենեակը  այս գործն է, որ կը կատարէ եւ յառաջիկայ ամիսներուն նոր պատուիրակութիւններ պիտի ուղղուին դէպի մեր զոյգ հանրապետութիւնները: Այս պատուիրակութիւններու դրական արդիւնքները կրնանք տեսնել Եւրոպայի մէջ հետագային տարուող գործունէութեան ընթացքին»:

Share.

Leave A Reply