Երէկ Հայաստանի Հանրապետութեան Ազգային ժողովի արտաքին յարաբերութիւններու, եւրոպական համարկման հարցերու եւ Արցախի Հանրապետութեան Ազգային ժողովի արտաքին յարաբերութիւններու մնայուն յանձնախումբերը միացեալ յայտարարութիւն մը հրապարակեցին շփման գիծի վերջին իրադարձութիւններուն շուրջ: Յայտարարութեան մէջ կը յիշուի.

Քննարկելով վերջին շրջանին տագնապի գօտիին մէջ իրավիճակի սրումը, Ատրպէյճանի կողմէ շարունակական ապակառուցողական եւ սադրիչ գործողութիւնները, Ատրպէյճանի մէջ պետական մակարդակով այլատեացութեան դրսեւորումը`

Կողմերը`

Կարեւոր կը նկատեն 1994 եւ 1995-ի զինադադարի անժամկէտ համաձայնագիրներով ստանձնած միջազգային պարտաւորութիւններու  կատարումը,

Կ՛ընդգծեն Վիեննայի եւ Ս. Փեթերսպուրկի վեհաժողովներուն ձեռք բերուած պայմանաւորուածութիւններու կարեւորութիւնը, մասնաւորապէս զինադադարի խախտումներու հետաքննութեան մեքանիզմներու ստեղծումը` իբրեւ կանխարգիլման գործիք,

Կ՛արձանագրեն, որ Ատրպէյճանի կողմէ տագնապի խաղաղ լուծման ուղղութեամբ ստանձնած պարտաւորութիւններու խախտումը, կանխարգելիչ միջոցառումներու իրականացման խոչընդոտումը պատասխանատուութիւն կը յառաջացնէ Ատրպէյճանի համար` հետեւանքներու իր ամբողջ ծաւալով,

Կը դատապարտեն Ատրպէյճանի ռազմաքաղաքական ղեկավարութեան կողմէ Ժընեւեան ուխտի հետեւողական խախտման քաղաքականութիւնը, քաղաքացիական բնակավայրերու դրացնութեամբ  զինուորական յենակէտերու տեղակայումը եւ խաղաղ բնակչութեան` իբրեւ կենդանի վահան օգտագործումը,

Կոչ կ՛ուղղեն միջազգային հանրութեան տագնապի գօտիին մէջ իրավիճակի սրման պատասխանատուներուն նկատմամբ կիրարկելու թիրախային քաղաքական եւ տնտեսական պատժամիջոցներ,

Կ՛ակնկալեն ԵԱՀԿ-ի Մինսքի խմբակի համանախագահներու աւելի  արդիւնաւէտ եւ գործուն ջանքեր` ուղղուած իրավիճակի կայունացման  եւ խաղաղ գործընթացի յառաջընթացի համար պայմաններու ապահովման,

Կը դիմեն միջազգային կառոյցներուն` աշխուժօրէն նպաստելու ղարաբաղեան տագնապի խաղաղ լուծման` աջակցելով ԵԱՀԿ-ի Մինսքի խմբակի համանախագահներու ջանքերուն:

Հայաստանի Հանրապետութեան Ազգային ժողովի արտաքին յարաբերութիւններու մնայուն յանձնախումբի նախագահ

Արմէն Աշոտեան

Հայաստանի Հանրապետութեան Ազգային ժողովի եւրոպական համարկման հարցերու մնայուն յանձնախումբի նախագահ

Նայիրա Զոհրաբեան

Արցախի Հանրապետութեան Ազգային ժողովի արտաքին յարաբերութիւններու մնայուն յանձնախումբի նախագահ

Արզիկ Մխիթարեան

12 Յուլիսի 2017
Ստեփանակերտ

Share.

Leave A Reply