ՊՐԱՀԱ, «Օրեր»– Պրահայի Հայաստանի դեսպանատան դիմաց երէկ բողոքի ցոյցի արտօնութիւն ստացած փոքրաթիւ ատրպէյճանցի երիտասարդներու աքտը ի թերեւ ելաւ՝ դեսպանատան տարածքին մէջ կազմակերպուած հակացոյցին հետեւանքով։

Ատրպէյճանցի ցուցարարներուն դիմաւորեցին հայկական դեսպանատան աշխատակիցները եւ Չեխիոյ հայ համայնքի ներկայացուցիչները` Հայաստանի, Արցախի ու Չեխիոյ դրօշներով, փողոցին մէջ լսուող ազգային-հայրենասիրական բարձր երաժշտութեամբ ու տասնեակ ցուցապաստառներով, որոնց մէջ էին նաև «Մարդկային վահանի ետև պատսպարուիլը անբարոյական արարք է», «Դադրեցուցէք յարձակողապաշտ Ալիևը», «Լեռնային Ղարաբաղը ազատ պետութիւն է», Եւրախորհրդարանի պատգամաւոր Էլենի Թեոխարուսի ծանօթ արժեւորումը` «Ատրպէյճանը ոչ միայն խախտած է հրադադարը, այլ իր խաղաղ բնակչութիւնը կ՚օգտագործէ իբրև մարդկային վահան» և այլն։

Ատրճէյճանցիներուն յատկացուած մէկ ժամուան ընթացքին ատրպէյճանցի ցուցարարները կարելիութիւն ունեցած են լսելու Հայ զինուորներուն, հայոց բանակին, Անդրանիկ զօրավարին ձօնուած երգեր, ինչպէս նաև Արամ Խաչատուրեան ու System of a Down։

«Օրեր» ամսագիրին և օrer.eu-ին լուսաբանելով բողոքի աքտը, Չեխիոյ մէջ Հայաստանի արտակարգ ու լիազօր դեսպան Տիգրան Սէյրանեան ըսած է. «Մեզ հասած տեղեկութիւններով Չեխիոյ մէջ բնակող ատրպէյճանցիները, ամենայն հաւանականութեամբ Պաքուէն հասած հրահանգով, Չեխիոյ ՀՀ դեսպանատան առջև կազմակերպեցին փոքրաթիւ այս բողոքի ցոյցը։ Ատրպէյճան պէտք է հասկնայ, որ անլուծելի խնդիրներու առնչութեամբ բողոքներու կազմակերպումը ոչ մէկ արդիւնքի կը հասցնէ մեզի։ Աւելի արդիւնաւէտ կ՚ըլլար, որ անոնք իրականացնէին Վիեննայի ու Սանկտ Պեթերսպուրկի ԵԱՀԿ Մինսքի եռանախագահներու միջնորդութեամբ վստահութեան մթնոլորտ ձևաւորելու շուրջ ձեռք բերուած համաձայնութիւնները։ Հայկական կողմը բազմիցս դատապարտած է ատրպէյճանական զինուժի` սեփական խաղաղ բնակչութեան որպէս կենդանի վահան օգտագործելու գործողութիւնները։ Չեխիոյ հայ համայնքի համակարգուած գործողութեան շնորհիւ ըստ էութեան ատրպէյճանցիներու կազմակերպած սադրանքը տապալեցաւ»։

Յառաջիկայ օրերուն ալ Ատրպէյճան պիտի շահարկէ խաղաղ բնակիչներու զոհուելուն հանգամանքը, ցոյցեր պիտի պատուիրէ տարբեր մայրաքաղաքներու մէջ, Հայաստանի դիւանագիտական կառոյցներուն առջև։ Չէ՞ որ լրատուամիջոցներուն համար օրեր առաջ տեղի ունեցածը թարմ պահելու համար լրատւութեան առիթ պէտք է ստեղծել։

Շփման գօտիի ատրպէյճանցիներու հերթական սադրիչ գործողութիւններուն հայկական կողմին տուած պատասխանէն ետք, ատրպէյեճանցի երեխայի ու անոր մեծ մօր ենթադրեալ զոհուիլը տեղեկատուական պատերազմի մէջ նոր յարձակումի առիթ դարձնելով, Ատրպէյճանը կրկին կը փորձէ շահիլ միջազգային կառոյցներու աջակցութիւնն ու հանրութեան համակրանքը։

Իրականութիւնը այն է, որ քանի դեռ հակամարտութիւնը չէ կարգաւորուած շփման գօտիին վրայ, նման իրավիճակներէ խուսափելու և երկու կողմերէն ալ զոհերու հաւանականութիւնը բացառելու այս պահուան միակ ելքը հրադադարի խախտման դիտորդական մեքանիզմներու ներդրումն ու կիրառումն է, ինչ որ Ատրպէյճան կտրկանապէս կը մերժէ։ Սա է պատճառը, որ Մինսքի խումբի համանագահաները մտագոհութիւն յայտնելով խաղաղ բնակիչների զոհվելուն գծով, կը յիշեցնեն, որ խնդիրի կարգաւորման ռազմական ուղի չի կրնար ըլլալ և անհրաժեշտ է վերադառնալ բանակցութիւններու սեղան։

Share.

Leave A Reply