«Արմենիա» հեռատեսիլի ընկերութեան «ռ-էւոլիւցիա» հաղորդման ընթացքին ՀՀ նախագահ Սերժ Սարգսեան ըսած է, որ Հայաստանի զինուած ուժերը ունին բաւարար քանակի զինատեսակներ եւ զինամթերք, որ պարբերաբար կը թարմացուի։

Խօսելով ապրիլեան պատերազմէն ետք բանակի համալրումներուն մասին, ՀՀ նախագահ Սերժ Սարգսեան յայտարարած է. «Մեր զինուած ուժերու սպառազինութիւնը պարբերաբար կը թարմացուի: Մենք լուրջ սպառազինութիւններ ապահոված էինք ինչպէս մինչեւ ապրիլեան քառօրեան, այնպէս ալ` անկէ ետք: Այլ խնդիր է, որ ցանկացած ռազմական գործողութիւն` ըլլայ միօրեայ, մէկ տարուայ, հինգ տարուայ, ատիկա դաս է, որ պէտք է սերտես եւ հետեւութիւններ ընես: Որովհետեւ նոյն ռազմական գործողութիւններուն ժամանակ է, որ կը դրսեւորուի, թէ հակառակորդդ ինչ կ՝օգտագործէ եւ ինչ ձեւով կ՝օգտագործէ, եւ փորձես գտնել անոր հակաթոյնը»:

Անդրադառնալով 80-ականներու զէնք ունենալու մասին իր յայտարարութեան, որ տարատեսակ շահարկումներու առիթ դարձաւ քաղաքագիտական շրջանակներու կողմէ, ՀՀ նախագահը ըսած է. «Իրենց քաղաքագէտ կոչողները պէտք է շատ լաւ հասկնան, թէ խօսքը որ լսարանի մէջ կը հնչէր եւ ինչ նպատակով: Ասիկա մէկ: Եւ երկրորդ` այո, այն ժամանակ մենք չունէինք որոշ զինատեսակներ, որ Ատրպէյճանը հասցուցած էր ունենալ: Իսկ ինչ է` գաղտնի՞ք է արդեօք, որ Ատրպէյճանը մեզմէ հարուստ է, որ Ատրպէյճանը աւելի շատ միջոցներ կը ծախսէ զինատեսակներու վրայ եւ այլն: Գաղտնիք չէ: Եթէ որեւէ մէկը կրնայ ըսել, որ ինքը երկու տարիէն կամ հինգ տարիէն կրնայ Հայաստանը դարձնել աւելի հարուստ պետութիւն, քան Ատրպէյճանը, այդ մարդը պէտք է հեռու քշել քաղաքականութենէ: Որովհետեւ ատիկա «շառլաթանութիւն» է, ատիկա սուտ է: Ատոր համար շատ տեւական ժամանակ պէտք է: Մենք ե՛ւ այն ժամանակ, ե՛ւ այսօր ունինք բաւարար սպառազինութիւն, որպէսզի կարենանք մեր զօրքի մարտական ունակութիւններու օգտագործմով չէզոքացնել այն վտանգը, որ կը սպառնայ Լեռնային Ղարաբաղին կամ Հայաստանի Հանրապետութեան»:

Նախագահը յայտնած է, որ պատերազմին միայն զէնքը չի յաղթեր: «Պատերազմի հիմնական գործող անձը զինուորն ու սպան են, զինուորն ու հրամանատարն են: Եւ այդ զինուորն ու հրամանատարը պէտք է ունենան ոչ թէ ամենաժամանակակիցը, որովհետեւ ատիկա անհնար է, որեւէ երկրի համար անհնար է, այլ բաւարար զինատեսակ եւ զինամթերք` խնդիրը լուծելու համար: Այսօր մեր զինուած ուժերը ունեն բաւարար զինատեսակներ եւ բաւարար զինամթերք»,- աւելցուցած է Սերժ Սարգսեան:

Share.

Leave A Reply