Սուրիոյ տեղեկատուութեան նախարար երկրչփ. Մուհամմէտ Ռամէզ Թարճման սուրիական լրատուամիջոցներու ներկայացուցիչներուն հետ զրոյցի մը ընթացքին ըսաւ, որ Դամասկոսի Միջազգային Ցուցահանդէսին բացումը Սուրիոյ քաղաքական, ընկերային եւ տնտեսական կեանքի բարելաւման ցուցանիշն է՝ աւելցնելով որ Սուրիա յաղթանակի սեմին կանգնած է, ու անոր սիրտը կը շարունակէ բաբախել նախկին ուժգնութեամբ:

«Ցուցահանդէսի ընթացքին, նախարարութիւնը յատուկ տաղաւար մը պիտի ունենայ՝ տեղական ձայնասփիւռներուն, թերթերուն եւ պատկեռասփիւռի կայաններուն միջոցով արձագանգելու ցուցահանդէսի անցուդարձերուն, հարցազրոյցներ վարելու եւ տեսակցութիւններ ունենալու այցելուներուն եւ մասնակիցներուն հետ», ըսաւ նախարարը:

Դամասկոսի Միջազգային Ցուցահանդէսի բացման արարողութիւնը պիտի սփռեն աւելի քան 20 արաբական եւ միջազգային լրատուամիջոցներ:

5 տարուան ընդմիջումէն ետք, Սուրիոյ տնտեսական, մշակութային եւ ընկերային կեանքի կարեւորագոյն ձեռնարկը՝ Դամասկոսի Միջազգային Ցուցահանդէսը բաց պիտի յայտարարուի Հինգշաբթի, 17 Օգոստոսին եւ պիտի շարունակուի մինչեւ 26 Օգոստոս 2017:

Share.

Leave A Reply