«ՌԻԱ Նովոսթի» լրատու գործակալութիւնը կը հաղորդէ, որ Ֆիլիփեան կղզիներու մայրաքաղաք Մանիլայի մէջ Հարաւասիական երկիրներու ընկերակցութեան արտաքին գործոց նախարարներու մակարդակով ժողովի ծիրին մէջ առանձին հանդիպում ունեցած Ռուսիոյ եւ Միացեալ Նահանգներու արտաքին գործոց նախարարներ Սերկէյ Լաւրովն ու Ռեքս Թիլըրսընը քննարկած են Ռուսիոյ դէմ Միացեալ Նահանգներու սահմանած նոր պատժամիջոցներն ու Ռուսիոյ` անոնց դէմ որդեգրած միջոցառումները:

Լրատուամիջոցներու հետ զրոյցի ընթացքին Լաւրով նշած է, թէ իր ամերիկացի գործընկերոջ ամէնէն առաջ կը հետաքրքրէր Ռուսիոյ պատասխան քայլերու բացատրութիւնը, ինչ որ մանրամասնօրէն ներկայացուած է անոր:

Կողմերը նաեւ քննարկած են համացանցային անվտանգութեան ուղղուած միացեալ քայլերու կարելիութեան, ինչպէս նաեւ միջազգային շարք մը խնդիրներ, մասնաւորաբար Քորէական թերակղզիին վրայ եւ Սուրիոյ մէջ տիրող իրավիճակի մասին:

Share.

Leave A Reply