Թուրքիոյ կառավարութեան գլխաւոր ընդդիմադիր՝ Հանրապետական ժողովրդային կուսակցութիւնը, իշխանութիւններէն բացատրութիւն պահանջած է Վանի Արտամէտ շրջանի հայկական գերեզմաննոցին վրայ հանրային լուացարաններ եւ հանդերձարաններ կառուցելու ծրագիրին վերաբերեալ:

«Էրմէնիհապէր» կը հաղորդէ, թէ իշխանութիւններուն տարած այս գործողութիւնը խիստ քննադատութեան արժանացած է քեմալական կուսակցութեան Իզմիրի պատգամաւոր Մուրատ Պաքանի կողմէ, որ հարցը հասցուցած է խորհրդարան:

Ըստ թրքական «Պիրկիւն» թերթին՝ Պաքան մշակոյթի նախարար Նուման Քուրթուլմուշէն եւ քաղաքաշինութեան նախարար Մեհմէտ Էօզհասէքէն պատասխան ստանալու ակնկալիքով գրաւոր հարցադրում կատարած է՝ խորհրդարանին խողովակով։

Քուրթուլմուշին ուղղուած հարցադրումին մէջ յիշուած է, թէ արդեօք Թուրքիոյ մշակոյթի նախարարութիւնը արտօնութիւն շնորհա՞ծ էր լուացարաններ կառուցելու վայրի մը մէջ, ուր, գիտնականներու գնահատումով՝ պատմական արժէք ունեցող նիւթեր կան, իսկ եթէ այդ հարցադրման պատասխանը բացասական է, արդեօք հետաքննութիւն սկսա՞ծ է այն պաշտօնատարներուն դէմ, որոնք արտօնած են այս ծրագիրին իրականացումը։

Յիշենք, որ այդ տարածքին մէջ կը գտնուի նաեւ Տիլքայա պատմական բլուրը, ուրկէ յայտնաբերուած են ուրարտական ժամանակներէ հնութիւններ։ Այս գծով, Պաքան իր հարցադրման մէջ ըսած է. «Ձեր նախարարութիւնը ինչպիսի՞ միջոցներու ձեռնարկած է Տիլքայա բլուրը պաշտպանելու եւ զայն ապագայ սերունդներուն փոխանցելու համար»:

Share.

Leave A Reply