«Էրմէնիհապէր»՝ վկայակոչելով թրքական «Թաքվիմ» թերթը կը հաղորդէ, որ Թուրքիոյ նախագահ Ռեճէպ Թայիպ Էրտողանը իր ղեկավարած «Արդարութիւն եւ զարգացում» կուսակցութեան Ռիզէի նահանգային խորհուրդի ժողովին ընթացքին ունեցած ելոյթին ժամանակ՝ կրկին մեղադրած է Գերմանիան` «Ահաբեկչութիւնը սատարելու մէջ»:

Էրտողանը նշած է, որ իրենք Գերմանիոյ վարչապետ Անկելա Մերգելին ուղարկած են 4500 անձնական գործի փաստաթուղթ` պահանջելով արտայանձնել ռազմական յեղաշրջման փորձէն ետք Գերմանիայէն ապաստան խնդրած մարդոց:

Էրտողան՝ նկատի ունենալով Թուրքիոյ մէջ ձերբակալուած գերմանական «Die Welt» պարբերականի լրագրող Տենիզ Իվճելին՝ նշած է, որ Գերմանիոյ իշխանութիւնները Թուրքիայէն կը պահանջեն  իրենց քաղաքացիներուն արտայանձնումը, սակայն միաժամանակ կը մերժեն Թուրքիոյ արտայանձման պահանջները:

Յիշեցնենք, որ թուրք-գերմանական յարաբերութիւնները լարուեցան, երբ 2 Յունիս 2016-ին Պունտեսթակը ընդունեց Հայոց Ցեղասպանութիւնը ճանչցող եւ դատապարտող բանաձեւ: Այնուհետեւ, Թուրքիան արգիլած էր գերմանացի պաշտօնեաներու մուտքը Ինճիրլիքի ռազմակայան: Լարուածութիւնը խորացած էր 15 Յուլիս 2016-ին, ռազամական յեղաշրջման փորձէն ետք Գերմանիոյ դիրքորոշման պատճառով: Գերմանիան հրաժարած էր Թուրքիոյ արտայանձնել քաղաքական ապաստան ստացած Թուրքիոյ քաղաքացիները:

Թուրքիոյ իշխանութիւնները ասոր պատասխանած էին կրկին Ինճիրլիք այցելութիւնը արգիլելով: Գերմանիան որոշում կայացուցած էր իր զինուորականները Ինճիրլիքէն դուրս հանելու եւ տեղափոխելու այլ երկիր:

Share.

Leave A Reply