Վարչապետ Կարէն Կարապետեան ընդունած է Մեծն Բրիտանիոյ եւ Հիւսիսային Իրլանտայի Միացեալ Թագաւորութեան լորտերու պալատի անդամ, պարոնուհի Քարոլայն Քոքսի գլխաւորած պատուիրակութիւնը: Վարչապետը բարձրօրէն գնահատած է Քարոլայն Քոքսի հայանպաստ եւ մարդասիրական գործունէութիւնը, ինչպէս նաեւ միջազգային գետնի վրայ ղարաբաղեան հիմնախնդիրին արդարացի ներկայացման ուղղուած անոր  քայլերը: Կարէն Կարապետեան յայտնած է, որ յատկապէս վերջին շրջանին նկատելի է հայ-բրիտանական յարաբերութիւններուն աշխուժացումը, ապա կարեւոր համարած է տնտեսական ոլորտին մէջ փոխգործակցութեան զարգացումը, գործարար կապերու խթանումը՝ զանազան համաժողովներու կազմակերպման միջոցով:

Կառավարութեան ղեկավարը ընդգծած է, որ երկկողմանի տնտեսական յարաբերութիւններու զարգացման հարցը առարկայական կերպով քննարկած է նաեւ ՀՀ մօտ մեծ Բրիտանիոյ դեսպանին հետ եւ աւելցուցած է, որ կան յստակ պատկերացումներ հետագայ քայլերուն ուղղութեամբ:

Պարոնուհի Քոքսը վարչապետին հետ խօսած է Հայաստան եւ Արցախ կատարած իր բազմաթիւ այցելութիւններուն մասին ու յայտնած, որ ջերմօրէն կապուած է հայ ժողովուրդին հետ: Պարոնուհին անհրաժեշտ համարած է հայ-բրիտանական տնտեսական համագործակցութեան զարգացումը, շեշտադրած միջխորհրդարանական յարաբերութիւններու խորացման անհրաժեշտութիւնը, ինչպէս նաեւ բարձրաստիճան պաշտօնեաներու փոխայցելութիւններու կազմակերպումը:

Տիկին Քոքս պատրաստակամութիւն յայտնած է ապագային եւս իր գործունէութեամբ աջակցելու հայ ժողովուրդին, նպաստելու հայ-բրիտանական կապերու սերտացման:

Share.

Leave A Reply