«Հորիզոն».- Կիրակի, 6 Օգոստոս 2017-ին, Քանատայի թեմի բարեջան առաջնորդ Բաբգէն Արք. Չարեան Լաւալի Ս. Գէորգի կից՝ Bon Pasteur եկեղեցւոյ մէջ նախագահեց Ս. եւ Անմահ Պատարագին, ապա քարոզեց։

Պատարագէն ետք, Բաբգէն Արքեպիսկոպոս ներկայ եղաւ Բժիշկ Կարպիս Հարպոյեանի «Բժիշկին Խօսքը» երրորդ եւ չորրորդ գիրքերու շնորհանդէսին։

Երկու հատորներուն ներկայացումը կատարեց Համբիկ Գարայեան։

Շնորհահանդէսի աւարտին, Սրբազան Հայրը խօսք առնելով գնահատեց պրն. Գարայեանը՝ գիրքերը համապարփակ կերպով ներկայացնելուն համար եւ շնորհաւորեց Բժիշկ Հարպոյեանը։

Բժիշկ Հարպոյեանի «Բժիշկին խօսքը» գիրքերու շարքին Ա. հատորը՝ «Բժիշկին Ա. Խօսքը» հրատարակուած է 2000 թուականին: Ապա 2011-ին հրատարակուած է իր երկրորդ աշխատասիրութիւնը՝ «Բժիշկին Բ. Խօսքը», իսկ «Բժիշկին Գ. Խօսքը» եւ «Բժիշկին Դ. Խօսքը» 2015-ին:

«Բժիշկին խօսքը» շարքին կողքին, Բժ. Հարպոյեանի գրական գործերէն հարկ է յիշել Հայոց Ցեղասպանութեան 100-ամեակին առիթով 2015-ին հրատարակուած «Խաչելութեան Ճանապարհը» եւ «Խաչելութենէն Յարութիւն» հատորները:

Բժիշկ Կարպիս Հարպոյեան 2009-ին «Համազգային»ի Կեդրոնական Վարչութեան կողմէ պարգեւատրուած է «Համազգայինի Շքանշան»ով՝ երկար տարիներ անսակարկ նուիրումով հայ հասարակական կեանքին եւ յատկապէս Համազգայինին ծառայած ըլլալուն համար:

Ան 27 Սեպտեմբեր 2015-ին պարգեւատրուած է նաեւ Քանատայի Հայոց Ազգային Առաջնորդարանի «ՅՈՎՀԱՆ ՄԱՆԴԱԿՈՒՆԻ» Ազգային եկեղեցական ծառայութեանց շքանշանով:

Share.

Leave A Reply