«Վերանորոգենք եւ Վերանորոգուինք` Մասնակցելով» միջթեմական երիտասարդական համագումարին երկրորդ օրը մասնակիցները համախմբուեցան Անթիլիասի «Կիլիկիա» թանգարանի «Գալուստ Կիւլպէնկեան» սրահին մէջ:

Այս օր յատկացուած էր Թուրքիոյ Սահմանադրական դատարանին մօտ Մեծի Տանն Կիլիկիոյ Կաթողիկոսութեան բացած դատին եւ Կիլիկիոյ կաթողիկոսարանի առաքելութեան եւ աշխատանքներուն, ինչպէս նաեւ Բերիոյ եւ Կիպրոսի թեմերուն երիտասարդներուն դիմագրաւած մարտահրաւէրներուն ու մտահոգութիւններուն արծարծման:

Օրուան առաջին նիստով Մեծի Տանն Կիլիկիոյ կաթողիկոսութեան բացած դատին գծով իրաւական յանձնախումբի անդամ, կաթողիկոսարանի միջեկեղեցական յանձնախումբի անդամ եւ Լիբանանեան համալսարանի միջազգային օրէնսդրութեան դասախօս դոկտ. Նորա Պայրաքտարեան դատի ընթացքին շուրջ զեկոյց ներկայացուց: Ան երիտասարդները իրազեկ դարձուց կաթողիկոսարանին բացած դատին հոլովոյթին, դժուարութիւններուն ու ներկայ փուլին` յայտնելով, որ այս դատը օրինական շրջագիծ ունի ու մեր ժողովուրդի պատմութեան մէջ մեծ նշանակութիւն ունեցող փուլ մըն է: Դոկտ. Պայրաքտարեան յայտնեց, որ Անթիլիասի մէջ 2012 թուականին տեղի ունեցած խորհրդաժողովը մեկնակէտն էր Հայ Դատը ճանաչումէն պահանջատիրական բնոյթ ուղղելու, որուն շնորհիւ Արամ Ա. Վեհափառ Հայրապետին թելադրանքով պատրաստուած է Սիսի Կաթողիկոսարանի կալուածներու վերադարձի դատին թղթածրարը:

Ապա ան անդրադարձաւ 2015 թուականին այս դատին Թուրքիոյ Սահմանադրական դատարան ներկայացուելուն եւ անոր շուրջ տեղի ունեցած դէպքերուն: Ան հակիրճ ներկայացուց այն օրէնքները, զոր դրած է ներկայ Թուրքիան, դիտել տալով որ անոնք կը խոչընդոտեն դատին հեզասահ ընթացքը։ Կան դժուարութիւններ, զոր կը դիմագրաւէ կաթողիկոսարանը արխիւային ու օրինական փաստաթուղթերու ոչ ամբողջական ըլլալուն պատճառով:

Խօսելով ներկայ իրավիճակին մասին` դոկտ. Պայրաքտարեան ըսաւ, որ ներկայիս դատը կը գտնուի Մարդկային Իրաւանց Եւրոպական դատարանին մէջ` նկատի ունենալով Թուրքիոյ քաղաքական իրավիճակը, որ չ՛արտօներ դատի տեղական դատարան փոխադրումը: Աւարտին զեկուցաբերը լսեց երիտասարդներուն մտահոգութիւնները եւ պատասխանեց այս դատին բարդութիւններուն վերաբերող հարցումներուն:

Այնուհետեւ, Բերիոյ թեմէն եկած Երիտասարդները ներկայացուցին ընդհանրապէս սուրիահայութեան եւ յատկապէս սուրիահայ երիտասարդներուն դժուարութիւնները: Այս առնչութեամբ խօսուեցաւ մասնաւորաբար երիտասարդներուն անգործութեան, համալսարանական ուսման դժուարութիւններուն, զինուորական ծառայութեան ու զինակոչութեան պատճառով ֆիզիքական ու հոգեկան տագնապներուն ու արտագաղթին մասին:

Խօսուեցաւ նաեւ եկեղեցւոյ դերակատարութեան մասին թէ՛ նիւթական, թէ բարոյական գետնի վրայ:

Ապա, Կաթողիկոսարանի տեղեկատուական բաժանմունքի վարիչ Պետրոս վրդ. Մանուէլեան հակիրճ կերպով ու լսատեսողական միջոցներով ներկայացուց կաթողիկոսարանի աշխատանքներն ու առաքելութիւնը ներկայիս: Ան ըսաւ, որ գաղութներու կազմութեան մէջ մեծ դեր ունեցած է Մեծի Տանն Կիլիկիոյ կաթողիկոսութիւնը, անցեալին թէ ներկայիս, բայց եւ այնպէս կաթողիկոսութիւնը քարեղէն շէնքեր չէ միայն, այլ իր ժողովուրդն է, հետեւաբար այս կեդրոնին շուրջ գտնուելով անհրաժեշտ է մասնակցիլ անոր աշխատանքներուն, որոնք կ՚ընդգրկեն.- արխիւատունը, Քրիստոնէական դաստիարակութեան գրասենեակը, կիրակնօրեայ վարժարանները, հրատարակչատան բաժինը եւ անոր առցանց գրատունը, տպարանը, Երիտասարդական բաժանմունքը, ՀԵՀՈՄ-ը, «Խաչեր Գալուստեան» մանկավարժական կեդրոնը, հայագիտական դասընթացքները, «Սիլիսիա թի.վի.»ն, գրատունը, «Կիլիկիա» եւ «Արամ Պեզիքեան» թանգարանները եւ այլն:

Օրուան վերջին նիստով Կիպրոսի թեմի երիտասարդները ներկայացուցին գաղութը եւ իրենց մարտահրաւէրները, որոնք առաւելաբար կը վերաբերին կիպրահայ երիտասարդներուն հայ եկեղեցիէն հեռու մնալուն, խառն ամուսնութիւններու թիւին աճին, ծրագիրներու հանդէպ անտարբերութեան եւ այլն:

Աւելցնենք, որ իւրաքանչիւր նիստի ընթացքին տեղի կ՛ունենային քննարկումներ եւ զրոյցներ:

Երիտասարդական համագումարին մասնակիցները օրուան աւարտին այցելեցին «Կիլիկիա» թանգարան, որմէ ետք հանդիպում ունեցան ՀԵՀՈՄ-ի երիտասարդներուն հետ:

Share.

Leave A Reply