«Հայերն Այսօր»էն խոր կսկիծով կ՛իմանանք, թէ 10 Օգոստոսին իր մահկանացուն կնքած Է ՀՀ Սփիւռքի Նախարար Հրանոյշ Յակոբեանի մայրը` Թէրէզա Հեքիմի Օհանեանը:

«Գանձասար»ի խմբագրութիւնն ու Վարչութիւնը, իրենց խորին ցաւակցութիւնը կը յայտնեն ՀՀ Սփիւռքի նախարար մեծարգոյ Տիկին Հրանոյշ Յակոբեանին եւ իր հարազատներուն ու կ՛աղօթեն հանգուցեալին հոգւոյն խաղաղութեան համար:

Թէրէզա Օհանեանի հոգեհանգիստը տեղի պիտի ունենայ 12 Օգոստոս 12-ին, ժամը` 18:00-ին, Երեւանի Կոնդի Սուրբ Յովհաննէս Մկրտիչ եկեղեցւոյ մէջ:

Յուղարկաւորութիւնը տեղի պիտի ունենայ 13 Օգոստոսին, ժամը` 13:00-ին, Գեղարքունիքի մարզի Սարուխան գիւղին մէջ:

Թող լոյս իջնէ իր շիրիմին եւ յիշատակն արդարոյն օրհնութեամբ եղիցի։

«Գանձասար»ի Խմբագրութիւն եւ Վարչութիւն
Հալէպ, Սուրիա

***

Թէրէզա Հեքիմի Օհանեան ծնած է 1927 թուականի դեկտեմբեր 9-ին, Նոր Պայազետի շրջանի Սարուխան գիւղի, ծառայողի ընտանիքի մէջ:

Սարուխանի միջնակարգ դպրոցը գերազանցութեամբ աւարտելէ ետք 1945 թուականին ընդունուած է Երեւանի մանկավարժական համալսարանի պատմութեան բաժանմունքը:

Համալսարանը աւարտած է գերազանց գնահատականներով եւ 1949 թուականին նշանակուած է աշխատանքի Նոր Պայազետի շրջանի Բատիկեան (այժմ` Գանձակ) գիւղի եօթնամեայ դպրոցին մէջ` որպէս պատմութեան ուսուցչուհի:

Երկու տարուայ մանկավարժական գործունէութենէն ետք նշանակուած է Լանջաղբիւր գիւղի ութամեայ դպրոցի տնօրէն եւ այդ պաշտօնին մէջ աշխատած է 1951 թուականէն մինչեւ 1966 թուական:

Թէրէզա Օհանեանի գլխաւորութեամբ դպրոցը դարձած է իր ժամանակի առաջաւոր ուսումնական հաստատութիւններէն մէկը, որն ունէր համերաշխ եւ նուիրեալ մանկավարժական անձնակազմ:

Հաշուի առնելով Թէրէզա Օհանեանի մարդկային, մասնագիտական, կազմակերպական բարձր որակները` 1966 թուականին անոր վստահած են Կամօ (ապա` Գաւառ) քաղաքի Հացառատ թաղամասի նոր հիմնադրուած հեռակայ միջնակարգ դպրոցի տնօրէնի պաշտօնը, եւ այդ պաշտօնին ան աշխատած է շուրջ 22 տարի:

Որպէս բարեխիղճ աշխատանքի գնահատական` ան պարգեւատրուած է բազմաթիւ շնորհակալագիրներով, պատուոգիրներով, Լենինի յոբելենական մետալով:

Թէրէզա Օհանեանի եւ անոր ամուսնուն` Գաւառի պետական համալսարանի հիմնադիր տնօրէն, Հայաստանի Հանրապետութեան վաստակաւոր մանկավարժ Հրանդ Յակոբեանի ողջ գիտակցական կեանքը սերունդներու կրթութեան ու դաստիարակութեան գործին սիրով եւ նուիրումով ծառայելու փայլուն օրինակ է:

Ան դաստիարակած է չորս զաւակ, ունի ութ թոռ եւ տասնհինգ ծոռ:

Անոր յիշատակը միշտ պայծառ պիտի մնայ իր աշակերտներուն, հարազատներուն եւ ծանօթներուն սրտերուն մէջ:

Share.

Leave A Reply