Տէր Զօրի Ազատագրումը՝ Օրը Օրին

0

«Գանձասար» հետեւելու համար Տէր Զօրի ազատագրման փուլերուն, իմանալու գետնի վրայ տիրող իրավիճակի ճշգրիտ մանրամասնութիւնները, կապ հաստատեց սուրիական բանակին կողքին Տէր Զօր գտնուող պատերազմական լրագրող, քաղաքական վերլուծաբան Սարգիս Գասարճեանի հետ, որ հետեւեալ մանրամասնութիւնները հաղորդեց.
«Տէր Զօրի ազատագրման պատերազմը հետեւեալ ձեւով կ՚ընթանայ։ Սուրիական բանակը երկու առանցքով կը փորձէ Տէր Զօր քաղաք հասնիլ։ Բանակի առաջին միաւորը նախ հասաւ 137-րդ գունդ կոչուած զինուորական գլխաւոր կէտին, որ քաղաքէն մօտաւորապէս 9 քլմ. հեռաւորութեան վրայ կը գտնուէր եւ 3 տարիէ ի վեր պաշարուած էր ՏԱՀԵՇ-ի կողմէ։ Զօրքը ճեղքեց պաշարման օղակը եւ հասաւ այնտեղ։
Բանակի երկրորդ միաւորը, որուն հետ կը քալեմ, ուղղուեցաւ Փալմիրէն դէպի հիւսիս արեւելք, նախ ազատագրեց Սըխնէ, ապա Քեպեճէպ գիւղը, ներկայիս զօրքը Շոլա անունով գիւղը ազատագրելու համար բուռն մարտեր կը մղէ։
Շոլան այդ շրջանի վերջին գիւղն է։ Անոր ազատագրումէն ետք, դէպի քաղաք տանող ճամբուն վրայ ՏԱՀԵՇի դիրքերը չէզոքացուած կ’ըլլան եւ սուրիական բանակին համար քաղաք մուտքը աւելի հեզասահ կ’ընթանայ։
Ցամաքային անվտանգ ճամբով քաղաք մտնելը մինչեւ հիմա կարելի չէ, զօրքը պատերազմելով քաղաք մտաւ, զինուորական պատասխանատուներ ուղղաթիռներով կը մտնեն։ Յառաջիկայ օրերուն, սակայն, կ՚ենթադրեմ որ այդ ճամբան կը բացուի։ Զօրքը քաղաք մտնելէն վերջ ալ բուռն պատերազմ պիտի մղէ, որովհետեւ քաղաքին մէջ ալ ահաբեկչական խմբաւորումներ կան։ Կը կարծեմ, որ քաղաքի պատերազմը շատ աւելի ծանր պիտի ըլլայ, որովհետեւ Տէր Զօր քաղաքի ազատագրումով ՏԱՀԵՇ կորսնցուցած պիտի ըլլայ իր վերջին դիրքերը»։

Share.

Leave A Reply