ՔԵՍԱՊԸ ԱՅՍՕՐ

0

Ի՞նչ է Քեսապի իրավիճակը այսօր: Հայկական այս աւանը վերագտա՞ծ է իր աշխուժութիւնը, յաջողած է ոտքի կանգնիլ ու բերքառատ ծառերով, շքեղ բնութեամբ հմայել զբօսաշրջիկները, ինչպիսի՞ դժուարութիւններ կը դիմագրաւէ բնակչութիւնը: «Գանձասար» այս հարցումները ուղղեց Քեսապի տեղւոյն ազգայիններէն Սողոմոն Լնդեանին: Ստորեւ կը ներկայացնենք հարցազրոյցը.  

 

«Գանձասար»- Քեսապի մէջ ինչպիսի՞ նորութիւններ կան այս տարի:

Սողոմոն Լնդեան.- Հողագործութիւնը նախորդ տարուընէ աւելի լաւ է, բերքն ու անոր գիները աւելի քաջալերական են: Ամառնային այս շրջանին, հակառակ հսկայական ծախսերուն, կարճ ժամանակաշրջանի մը մէջ կրցանք Քեսապի Համալիրը նորոգել եւ բարեկարգել, որպէսզի այստեղ մատչելի գիներով ծառայութիւն մատուցուի այցելուներուն:

Այս տարի յատկանշական էր նաեւ ՍՕԽ-ի Կազդուրման կայանի բարեկարգումը, շնորհիւ ՀՕՄ-ի ներդրումներուն, ՍՕԽ-ի եւ տքնաջան աշխատանքին մեր այն երիտասարդներուն, որոնք գիշերն ու ցերեկը իրար խառնելով 20 օրերու ընթացքին նորոգեցին այս կառոյցը: Կազդուրման կայանէն ներս յաջորդաբար տեղի ունեցան գաղութիս զանազան միութիւններու տարեկան բանակումները:

«Գ.»- Քեսապի բնակչութիւնը ինչպիսի՞ դժուարութիւններ կը դիմագրաւէ:

Ս.Լ.- Հիմնական դժուարութիւնը մարդուժի պակասն է, երիտասարդութիւնը զանազան պատճառներով կը գաղթէ, պատերազմի պայմաններուն ու տնտեսական ծանր իրավիճակին բերումով: Մենք Քեսապը վերածաղկեցնելու համար աշխատող ձեռքերու պէտք ունինք:

«Գ.».- Կրթական եւ մշակութային կեանքը ի՞նչ վիճակ կը պարզեն:

Ս.Լ.- Ընդհանրապէս բոլոր միութիւնները կը գործեն, ինչպէս՝ ՀՄԸՄ-ը, Համազգայինը, Սուրիոյ Երիտասարդաց Միութիւնը, Սուրիոյ Պատանեկան Միութիւնը եւ այլն: Անոնց աշխատանքը բնականոն կ’ընթանայ, Համազգայինը, ինչպէս նախորդ տարի, այնպէս ալ այս տարի ներկայացուց քառաձայն համերգ մը, կատարողութեամբ «Կիլիկեան» երգչախումբին, որուն գեղարուեստական ղեկավարն էր տիկ. Գայիանէ Սիմոնեան-Տէրեանը, իսկ դաշնակահարը՝ քեսապահայ Ռազմիկ Մելքոնեանը:

Դպրոցներէն ներս կ՛ակնկալենք աշակերտութեան թիւի նուազում: Հալէպէն ընտանիքներ, որոնք նախապէս հաստատուած էին Քեսապ, Հալէպի ազատագրումէն ետք վերադարձան իրենց ծննդավայրը:

Քեսապ հաստատուած են նաեւ 120 եագուպիահայեր, անոնց տրամադրուած են բնակարաններ, իսկ դպրոցներէն ներս եագուպիահայ աշակերտները անվճար կ’ուսանին: Քեսապ հասած օժանդակութիւններէն բաժին կը հանուի նաեւ անոնց՝ առանց խտրականութեան:

Քեսապի մէջ կը գործեն 3 համայնքներու պատկանող դպրոցներ: Ուսումնասիրաց Միացեալ ճեմարանը, որ մանկապարտէզէն մինչեւ երկրորդական ունի 230 աշակերտ, մեծագոյն դպրոցն է: Ահաբեկիչներու Քեսապ ներխուժման հետեւանքով սրբապղծուած համարեա՛ բոլոր եկեղեցիները վերաօծուեցան ու նորոգուեցան:

«Գ.».- Ապահովական առումով ի՞նչ է վիճակը, երթեւեկութեան հարցեր կամ դժուարութիւններ կա՞ն: 

Ս.Լ.- Այս իմաստով նախորդ տարուընէ շատ աւելի ապահով կը զգանք, մենք լաւատես ենք գալիքին նկատմամբ:

Նախապէս աւելի դժուար էր Լաթաքիա երթալը, մէկուկէս տարիէ իվեր Լաթաքիա-Քեսապ մայր ճամբան ողորկ է: Լաթաքիա կը հասնինք 40 վայրկեանէն: Այս իսկ պատճառով բարելաւուած է նաեւ Լաթաքիայէն Քեսապ այցելողներուն թիւը, միաժամանակ բերքի արտահանումը:

«Գ.»- Առողջապահական առումով, Քեսապի մէջ բժիշկի կամ դեղորայքի ապահովման դժուարութիւններ կա՞ն:

Ս.Լ.- Ունինք բժիշկ մը, բայց մնայուն չէ. անոր բացակայութեան գիւղը կը մնայ առանց բժիշկի: Գիւղը ունի նաեւ դարմանատուն մը, որ կը գործէ սովորական աշխատանքային օրերուն: Դեղորայք ապահովելու դժուարութիւն չունինք: Լաթաքիայէն Քեսապ կը հասնի ամէն բան:

Վերջերս ՄԱԿ-ին միջոցով գիւղիս տրամադրուեցաւ շարժական դարմանատուն մը, որ ձրիաբար կը քննէր եւ կը պատուաստէր փոքրիկները:

«Գ.»-Խաղաղ ու բարգաւաճ օրեր կը մաղթենք քեսապահայութեան:

Հարցազրոյցը վարեց

Շաղիկ Սրուրեան

 

Share.

Leave A Reply