Սուրիոյ Նախագահը Անգամ Մը Եւս Քաջալերեց Ստեղծագործ Իգական Սեռը

0

Երեքշաբթի, 29 Օգոստոս 2017-ին Սուրիոյ Զբօսաշրջութեան Նախարարութեան հովանաւորութեամբ ու Հալէպի արդիւնաբերական պալատին կազմակերպութեամբ Հալէպի ալ Շահպա հիւրանոցին մէջ տեղի ունեցաւ «Հալէպի Ստեղծագործ Եւ Մաքառող Կանայք» խորագիրը կրող եռօրեայ ցուցահանդէսին բացումը: Գունեղ տաղաւարներու մէջ ցուցադրուած էին գոհարեղէններ, առտնի իրեր, ասեղնագործ ծածկոցներ եւ այլն:

Այս առիթով, Հալէպի արդիւնաբերական պալատի նախագահ երկրչփ. Ֆարէս Շահապի շեշտեց ցուցահանդէսին կարեւորութիւնը որպէս կարեւոր քայլ Հալէպի ազգային տնտեսութեան աջակցելու եւ գործարար կիները քաջալերելու ուղղութեամբ: Ան դիտել տուաւ, որ ցուցահանդէսը առիթ մըն է կնոջ ստեղծագործական աշխատանքը քաջալերելու, անոր ձեռագործները բարենպաստ գիներով վաճառելու: Նման ձեռնարկներ կը նպաստեն կիներու կենսամակարդակը բարձրացնելու, գործի նոր առիթներ ընծայելու, ինչպէս նաեւ սուրիական ընկերութեան մէջ անոնց դիրքը ամրապնդելու:

Հալէպի արդիւնաբերական պալատի «Գործարար Կիներ» յանձնախումբի նախագահ Ալին Լահտօ «Գանձասար»ին յայտնեց, թէ ցուցահանդէսը մեծ մարտահրաւէր մըն է հալէպցի կնոջ համար, որպէս արտադրող եւ գործարար էակ իր ներկայութիւնը ցայտուն դարձնելու մեր ընկերութենէն ներս:

Հալէպի արդիւնաբերական պալատի «Գործարար Կիներ» յանձնախումբի անդամ Սոնա Գաբրիէլեան այս առիթով ըսաւ. «Հալէպի արդիւնաբերական պալատի «Գործարար Կիներ» յանձնախումբը կը բաղկանայ 15 գործուն անդամներէ: Կը կազմակերպենք կիներու յատուկ դասընթացքներ, որոնց հիմնական նպատակն է կնոջ թաքուն ձիրքերը բացայայտել եւ թափ տալ ստեղծագործական աշխատանքին: Նախորդ 4 տարիներուն կազմակերպեցինք 5 ցուցահանդէս` յաղթահարելով պատերազմի դժուար պայմանները»:

Հալէպի արդիւնաբերական պալատի փոխնախագահ Պասէլ Նասրի «Գանձասար»ին յայտնեց թէ. «Սուրիոյ մէջ իգական սեռը քաջալերելու, անոր ստեղծագործական աշխատանքն ու սեփական առեւտուր հիմնելու կարելիութիւններ պիտի ստեղծենք, որպէսզի կինը գործուն անդամ դառնայ մեր ընկերութեան մէջ եւ չսահմանափակուի իր առտնի աշխատանքներով ու մայրական պարտաւորութիւններով: Մենք հպարտ ենք գործարար իգական սեռին վճռակամութեամբ ու յառաջիկայ տարիներուն աւելի լայնածիր աշխատանք կ՛ակնկալենք»:

Յիշենք, որ ցուցահանդէսը այցելեցին Հալէպի նահանգապետ Հուսէյն Տիապ եւ Պաաս կուսակցութեան Հալէպի քարտուղար Ֆատէլ Նաճճար, որոնք բարձրօրէն գնահատելով իգական սեռին աշխատանքը` գնահատագիրներ յանձնեցին ցուցահանդէսի մասնակիցներուն:

Յիշենք որ ցուցահանդէսին կը մասնակցէին 12 հայ կիներ եւ Սուրիահայ Օգնութեան Խաչի Ձեռարուեստի Յանձնախումբը, որ կը ցուցադրէր հայկական ձեռագործներ:

Այս խմբակը նախանցեալ շաբաթ մասնակցած էր նաեւ Դամասկոսի Միջազգային 59-րդ ցուցահանդէսին:

Մասնակիցներուն մեծագոյն նուէրը Սուրիոյ նախագահ տոքթ. Պաշշար ալ Ասատի անակնկալն էր: Նախքան ցուցահանդէսին փակումը, նախագահը քաջալերելու համար Հալէպի գործարար կիները, որոշած էր գնել ցուցադրուած ամբողջ ապրանքը: Երեւոյթ մը, որ մեծապէս խանդավառեց ու նորանոր աշխատանքներու մղեց մասնակից կիները:

Այս ձեռնարկը, խորքին մէջ, սուրիական ընկերութեան համերաշխութիւնը կ՛արտացոլէր: Ցուցահանդէսի մասնակիցներուն մէջ կային զանազան ազգութիւններու եւ դաւանանքներու պատկանող կիներ, սակայն բոլորն ալ կը միանային սուրիական ընկերութեան ամուր հիւսուածքին մէջ, այն ընկերութեան, զոր քայքայել փորձեցին արտաքին ուժերը, սակայն ընկերային յարաբերութիւնները, միասնական աշխատանքն ու Սուրիոյ քաղաքացի ըլլալու բարձր գիտակցութիւնը կանխեցին այդ քայքայումը ու աւելի ուժեղ դարձուցին նոյնիսկ իգական սեռը, սուրիական ընկերութեան քնքոյշ, բայց տոկուն այս էակը:

Մարէն Պապեան

Share.

Leave A Reply