Տէր Զօրի Բնակչութեան Մարդասիրական Օժանդակութիւն Բաշխուեցաւ

0

Պատերազմական լրագրող, քաղաքական վերլուծաբան Սարգիս Գասարճեան այսօր «Գանձասար»ին հաղորդեց Տէր Զօրի մէջ արձանագրուող զինուորական եւ մարդասիրական վերջին զարգացումները՝ դիտել տալով որ սուրիական բանակը երկու առանցքներէ մօտենալ սկսած է Տէր Զօրի օդակայանին ու յառաջիկայ օրերուն կը նախատեսուի օդակայանի ազատագրումը:

Ուրբաթ, 8 Սեպտեմբերին, 3 տարի վերջ առաջին անգամ ըլլալով, ցամաքային ճամբով սննդամթերքի եւ մարդասիրական օժանդակութիւններու շարասիւներ հասած են Տէր Զօր:
Շարասիւներուն մաս կազմած են երեք տեսակ փոխադրակարգեր՝ պետական փոխադրակարգեր, որոնց պարունակած սննդամթերքը նպաստաւոր գինով վաճառուիլ սկսած է բնակչութեան եւ մարդասիրական օժանդակութեան փոխադրակարգեր: Օժանդակութիւններու մէկ մասը տրամադրուած է միջազգային Կարմիր Մահիկ եւ Կարմիր Խաչ կազմակերպութիւններուն կողմէ, միւս մասը՝ Ռուսիոյ Դաշնութեան կողմէ:
Սուրիական Կարմիր Մահիկ կազմակերպութիւնը օժանդակութիւններու բաշխման 9 կեդրոն ճշդած է՝ կարգաւորելու բաշխումի ընթացքը:

Յիշենք, որ Տէր Զօրի բնակչութիւնը վերջին երեք տարիներուն ՏԱՀԵՇ ահաբեկչական կազմակերպութեան զինեալներուն կողմէ պաշարման ենթարկուած էր ու տնտեսական եւ կենցաղային ծանր պայմաններու մէջ յայտնուած: Պաշարման տարիներուն, ռուս-սուրիական օդուժը ուղղաթիռներով բնակչութեան սննդամթերք կը հայթայթէր:

Share.

Leave A Reply